رواية كاملة بقلم ندى محمود
ندى محمود

_ مع إني مش عاجبني الوضع ده من ساعة ماسابت بيتها وجات هنا وبحاول اتجنب حسن على قد ما أقدر عشان متحصلش مشكلة بينا .. بس أهو خلينا نشوف آخر العناد والغباء اللي هما فيه هيوصل لفين
تحدثت الأم أخيرًا بنبرة حادة :
_ أنا مس هسمح لحسن يكسر بنتي ويزعلها تاني عشان يكون في علمكم .. وأنا بنفسي هكلم بنتي الصبح ولو حسيت إنها مضايقها أو نبرة صوتها مش طبيعية مش هسكت
هتف طاهر بنبرة رجولية قوية :
_ بنتك وحسن لسا شباب صغيرين وطبيعي تحصل مشاكل بينهم كدا .. أنا اللي خلاني وافقت ومشيت ورا كلام بنتي لما شوفتها إزاي مش عايزة تكمل ومتدمرة ، لكن لو عليا أكيد مش هكون حابب أن الأمور بينهم توصل للوضع ده .. وطالما هو متمسك بيها بالشكل ده خلاص نسيبهم يحلوا اللي بينهم مع بعض ، وادعيلهم ربنا يهديهم
أجابت شبه مستنكرة باحتجاج :
_ آه خليك إنت في صف ابن اخوك كدا دايمًا كأنه ملاك مبيغلطش !
تأفف بصوت مسموع ونفاذ صبر ، ولم يعيرها إهتمام كثيرًا حيث تجاهل ما قالته وغير مجرى الحديث ، عندما نظر لميار وقال بصوت أجشَّ :
_ أنا قدمتلك في الجامعة اللي في القاهرة هنا عشان تكملي السنة اللي فاضلة ليكي .. وأظن كدا موضوع المانيا ده ميتفتحش تاني أبدًا ياميار
مجبرة ومضطرة على الخنوع لأوامر عمها ، فليس أمامها سبيل غير الإذعان سواء له أو لزوجها .. اطرقت رأسها أرضًا وأماءت بخفة في موافقة ، بينما علاء فنقل نظره بين أبيه وبينها في أعين ملتهبة بشرارات الغضب وهدر بهدوء ماقبل العاصفة :
_ إنت قدمتلها من غير ماتقولي يابابا !!
تشدق طاهر بثبات ونبرة صلبة :
_ أيوة قدمتلها عشان تكمل وتاخد شهادتها ، أكيد مش هنعاقبها على الغلط اللي عملته بدراستها يعني
رمقها علاء بنظرة دبت الرعب في أوصالها ثم هتف بلهجة صارمة وساخطة :
_ بس أنا مش موافق ومش هتكمل
تبادلوا جميعهم نظرات الاستغراب باستثناء ميار التي اعتاظت بشدة وهمت بأن تجيب عليه ولكن رأت عمها يرفع كفه يطلب منها عدم الحديث فسكتت ، ليتحدث طاهر بنظرة حازمة :
_ وأنا اللي قولت هتكمل ولا إنت هتكسر كلمتي بقى يا أستاذ
هدأت نبرة علاء قليلًا احترامًا لوالده وقال بنبرة مهذبة واصرار على قراره :
_ لا مش بكسر كلمتك يابابا ولا حاجة .. بس أنا مش عايزها ترجع الجامعة تاني
استشاطت بشدة من تحكمه في مستقبلها دون أن يأخذ رأيها حتى .. فهدرت ساخطة شبه منفعلة :
_ أنا دراستي أهم حاجة عندي ومستحيل مكملش
هنا انفجر البركان حيث صرخ بصوته الجهوري وهو يضرب بكفه على سطح المائدة وعيناه حمراء كالدم :
_ وأنا قولت مش هتكملي .. أنا إيه ضمني تعملي إيه في الكلية ولا تتعرفي على مين ، طول ما إنتي على ذمتي مش هتطلعي من البيت ، كفاية الفضيحة اللي داريتها عليكي ، لما اطلقك يبقى وقتها اعملي اللي تعمليه مـ…..
صاح طاهر منفعلًا وبنبرة عالية :
_ عـــــــــلاء
سكت تمامًا بعد صيحة أبيه وهو يزفر النيران من بين شفتيه ، أما هي فطالعته بأعين دامعة تحمل الخزي .. بالرغم من كل ماسردته له حول حياتها كيف ، وماحدث معها بالضبط واوضحت له أنها لم تفعل شيء بإرادتها بل ومن المستحيل أن تفعل شيء كهذا من الأساس ، لم يصدقها ومازال يتهمها بالفسق وأنها قد تفعل أي شيء مخل .. كل ما قالته له لم يثمر ذرة واحدة من الثقة بينهم !! .
رجعت بالمقعد للخلف وهبت واقفة لتهرول راكضة إلى غرفتها بالأعلى ، بينما طاهر فوقف هو الآخر والقى نظرة غاصبة على ابنه يهتف بلهجة آمرة لا تقبل النقاش :
_ طيب احترم وجودي يابشمهندس حتى ولا كبرت علينا خلاص عشان تتكلم بالطريقة دي قدامي ، ولعلمك أنا مكنتش باخد رأيك أصلًا في موضوع الجامعة وكلامي كان واضح لما قولت قدمتلها وهتكمل ، يعني سواء وافقت أو رفضت
فاللي قولته هيتنفذ ياعلاء
ثم استدرات واتجه لمكتبه لتهم الأم بمحادثة أبنها وتهدئتها قليلًا ولكنه هو ايضًا استقام وانصرف مغادرًا المنزل كله ، لتلتفت هي حولها الثلاثة كل منهم ذهب في جهة وبقيت هي بمفردها على المائدة ، ولكن هل هناك شهية للطعام بعد كل ماحدث .. بدأت في توضيب المائدة ووجهها تمكن منه العبوس ! ……
***
خرجت من الغرفة واتجهت إليه حيث كان جالسًا على الأريكة بالصالون ، بمجرد ما أن رآها قال باسمًا :
_ تعالى
فرد ذراعه يحثها على الانضمام إليه لتطيل النظر بسكون دون أن تتحرك والخجل يستحوذها كليًا ، فيتنهد شبه ضاحكًا ويعتدل قليلًا في جلسته ويجذبها من ذراعها لترتمي بين ذراعيه ويقول مشاكسًا :
_ مالك مكسوفة مني أوي كدا ليه ؟!!
انزوت نظرها عنه باستحياء وتمتمت بنبرة تحمل الاستنكار :
_ المفروض متكسفش مثلًا بعد اللي قولته من شوية !!
قرب وجهه منها وحرك انفه على وجنتها يداعبها ويهمس بنفس نبرة المكر التي سمعتها منه منذ دقائق :
_ أنا برأى وفري الكسوف ده للمراحل الجاية
يصدمها كلما يتحدث فهذا لا يمكن أن يكون ” كرم ” الذي تعرفه حق المعرفة ، أين حيائه وأخلاقه .. صدمها من قبل عندما رأت جانبه المخيف والآن يصدمها الضعفين وهي ترى بشائر انحرافه معها !! .
ابتعدت بعض الشيء عنه وقالت منذهلة بنظرات بريئة :
_ أنا اللي المفروض اسألك مالك ياكرم ! .. لتكون شارب حاجة ؟!!
قهقه بخفة وعاد يجذبها إليه مجددًا ويكمل ولكن هذه المرة بنبرة جادة بعض الشيء :
_ تعالي هحكيلك مالي
سكنت وانتظرته حتى يبدأ في الكلام فسمعته يهتف في البداية بجمل غامضة لم تفهم منها شيء ! …..
_ الأرض الزراعية لم صاحبها بيهملها بتجف وبتبقى صحراء ، زيها زي لما تكوني مهتمة بوردة ويجي حد ينتف منها جزء بتدبل وبتموت ، عشان أكون اوضح بظبط زي شخص مريض بائس وجروحه ملهاش علاج والدكاترة كلهم تنبأوا بموته القريب ، وفجأة القدر يبعتله العلاج .. عارفة إيه هو ؟
رأى في عيناها التساؤلات وعدم الفهم فاسترسل في حديثه بعاطفة ونظرات متأثرة وحزينة :
_ إنتي العلاج ياشفق .. واروى هي الأرض الزراعية اللي بغبائي اهملتها وهي الوردة اللي محافظتش عليها وأنا الشخص المريض البائس ، وإنتي كنتي علاج لجروحي .. قدرتي تضمدي جروحي في فترة صغيرة جدًا ، أنا يمكن مكنتش ببين لحد أوي بس صدقيني أنا مكنتش كدا أبدًا قبل ما اتجوزك .. كنت بظهر القوة قدام الكل وإني ثابت وخلاص نسيت بس في الحقيقة موت اروى كان بيقتلني بالبطيء ، شوقي ليها والنار اللي جوايا كل ما افتكر شكلها واللي حصلها كانوا مخليين حياتي عذاب ، لغاية ما ظهرتي إنتي معرفش عملتي فيا إيه وإزاي في فترة قليلة كدا قدرتي تغيري كله ده فيا وتسترجعي ذاتي اللي كنت متوقع إن خلاص مستحيل أكون كرم اللي كان قبل مايموت أبوه وأروى .. كنتي كل مرة بتلمسيني فيها بتصحى حاجة مختلفة جوايا وأنا كنت بتجاهل وبعمل نفسي عبيط لما بتأثر بيكي وبقول عادي ، أنا فعلًا بطبيعتي شخص خجول وبحرج جدًا .. مفكرتيش أنا ليه كنت بتوتر كل ما تقربي مني مع إني مكنتش كدا مع اروى والدليل إنك لو شفتي صورى معاها بعد ماكتبنا الكتاب هتلاقيني بتصرف بطبيعية جدًا من غير أي خجل .. والسبب إني معاكي كنت مدرك تأثيرك عليا وإنك بتلمسي حجات جوايا خاصة جدًا فكنت بتوتر منك جدًا ، بس بعدين سبت نفسي وحاولت اتصرف معاكي على طبيعيتي بدون حواجز أو توتر واكتشفت قد إيه إنتي غالية عليا وإني بحبك جدًا
رغم كل ما سرده لها وكيف كانت سعيدة وهي يتحدث هكذا عنها وكانت تطالعه بأعين تطلق شرارات العشق والحب ، ولكن عند آخر جملة قالها كطفلة صغيرة وساذجة عبست وقالت ساخرة :
_ آه ما أنا عارفة بتحبني زي اختك !!
اطلق ضحكة مرتفعة وأجابها مندهشًا يسخر منها حقًا :
_ بلاش هبل متضحكيش الناس عليكي .. هو في حد بيحب مراته زي اخته ياعبيطة ، وبعدين أمال أنا كنت بحكي في إيه ده كله وبقول تأثر ولمس وحجات كدا وإنتي تقوليلي اختك !!!!
لمعت عيناها بوميض مختلف وأشرق وجهها بسعادة غامرة ، لتقول بعدم استيعاب واستحياء بسيط امتزج بفرحتها العفوية :
_ يعني قصدك بتحبني زي ما أنا بحبك !!
هز بحاجبيه وقال باسمًا باتساع وبمشاكسة :
_ وأكتر كمان
ضمت شفتيها تخفي ابتسامتها الخجلة ثم تكمل بدلال غير مقصود :
_ لا أنا أكتر !
اقترب منها بحميمية شديدة وقال غامزًا بلؤم :
_ طيب ماتيجي نحكم ونشوف مين الأكتر
ارتبكت وارتفع اللون الأحمر لوجنتيها ليقطع لحظاتهم الأولى رنين هاتفه الموضوع على سطح الطاولة الصغيرة بجانبهم ، فثبتت هي نظرها على شاشته تقرأ الاسم وقالت مسرعة في خفوت لتتهرب من محاصرته لها :
_ سعيد بيتصل ياكرم ( الحارس )
التفت برأسه ناحية الهاتف وعقد حاجبه من اتصاله ثم التقطه يجيب عليه بخشونة :
_ أيوة ياسعيد في إيه ؟
_ كرم بيه في اتنين مصممين يدخلوا الڤيلا وواحد منهم بيقول أنه عم شفق هانم والتاني ابنه
…………. نهاية الفصل ……….(( ضروب العشق ))
_ الفصل الواحد والثلاثون _
رأت ملامح وجهه التي تغيرت واصبحت حادة بعد أن كان هادىًا ومرحًا معها ، وفي ظرف لحظة رأته يقف ويقول لها بنبرة مريبة :
_ خليكي هنا ياشفق ومتطلعيش ورايا مفهووم
أماءت له بالموافقة ثم قالت بقلق بالغ :
_ حاضر بس في إيه ؟
لم يجبها واندفع إلى الخارج واغلق باب المنزل خلفه فهبت هي واقفة وهرولت باتجاه النافذة تنظر له من خلال فرأته يتجه ناحية الباب الرئيسي وإذا بها تجد عمها وابنه يظهران من خلف الباب فاظهرت شهقة منصدمة امتزجت بالهلع وهمست في نبرة مرتعدة :
_ عمي بيعمل إيه هنا !!
استدارت وهرولت إلى الغرفة لكي ترتدي شيئًا يستر جسدها جيدًا وتخرج لهم لتحاول انقاذ مايمكن انقاذه في هذا الوضع المريب ، فبالتأكيد “كرم” لن يصمد أمام جموحه كثيرًا ….
وقف كرم أمامهم يطالعهم بأعين تقذف شرارات اشتعال القنبلة وخرج صوته رجولي ومريب :
_ مش كنت اديتني خبر حتى الأول ياكمال بيه عشان استقبلكم استقبال يليق بيكم
كان كمال جامدًا تمامًا أمام نظرته ونبرته حتى أجابه بكامل الثقة والثبات :
_ جاي أخد بنت اخويا اللي اتجوزتها من غير مانعرف .. والأفضل ليك إنك متعترضش
اطلق ابتسامة متغطرسة على شفتيه وهو يجيبه بنظرة أكثر رعبًا من السابقة :
_ بنت أخوك اللي هي مراتي !! .. اممم وياترى هتاخدها إزاي بقى
هنا تحدث جاسر بغضب عارم وقوة :
_ هناخدها سواء بلزوق أو بالعافية ياكرم
طالت نظرة كرم إلى ذلك ” الجاسر ” وهو يبتسم بأعين لا تبشر بالخير وقال بعد لحظات من الصمت القاتل :
_ إنت بقى جاسر .. سيف حكالي عنك كتير
ثم اقترب منه وهمس بالقرب من أذنه بصوت اشبه بفحيح الأفعى وبه لمسة الشر :
_ بس أنا مش سيف اللي هيكتفي بأنه يعمل مشكلة ويقاطعم .. وبما إنك جيتلي برجيلك فاللي عملته مش هعديه بالساهل ، ودلوقتي اطلع إنت من الموضوع ده احسلك وإلا مش هخليك تشوف نور الشمس تاني
صاح كمال منفعلًا في كرم :
_ وأنا قولت هناخدها يابن العمايري وورينا هتمعننا إزاي
_ إنت عارف كويس أوي أنا همنعكم إزاي .. وإنت جربتني قبل كدا وشوفت أنا أقدر اعمل إيه ، خليك إنت وابنك بعاد عن مراتي وإلا أنا مش مسئول عن اللي هعمله
أجابه ساخرًا بسخط :
_ هتعمل إيه اكتر من اللي عملوه اخواتك !
ابتسم بشراسة وغمغم بوعيد حقيقي :
_ زين وحسن معملوش حاجة قصاد اللي هعمله ، عيلة العمايري كلها عندها رحمة بس أنا لا
هرولت شفق إليهم ووقفت خلف زوجها توجه حديثها لعمها باستياء :
_ إنت إيه اللي جايبك ياعمي ؟!
_ جاي أخدك شكلك نسيتي إنك ليكي عم ورايحة تتجوزي من ورانا زي البنات الــ …..
خرج صوت كرم الذي نفضهم وأولهم شفق عندما وجدته يصرخ يقاطع عمها ومن الواضح أنه بالفعل بدأ يخرج عن قوقعة صموده :
_ لغاية هنا وكفاية خد ابنك القذر ده واطلعوا من بيتي بالذوق !
انحنى جاسر ناحية شفق يجذبها من ذراعها من خلفه هاتفًا :
_ مش قبل ماناخدها معانا
طفحت حممه البركانية إلى حد الجنون عندما رآه يلمسها وتحول إلى وحش كاسر ، اغار عليه يلكمه بعنف صارخًا :
_ شكلكم مش بتفهموا بالأدب
كبلته شفق تحاول ردعه وإبعاده هاتفة تتوسله قبل أن يفقد أعصابه أكثر من ذلك ويسوء الوضع بشدة :
_ كرم خلاص ابوس إيدك سيبه .. عشان خاطري !
اسند كمال ابنه ونظر لكرم نظرة نارية كلها حقد وغضب هاتفًا بنبرة تحمل الوعيد الشيطاني :
_ هنمشي بس افتكر إن إنت اللي بدأت الحرب بينا
لم يعيرهم اهتمام وحدجهم شزرًا ومازالت شفق ممسكة به تمنعه عن التحرك ، فهو لديه غضب مخيف واعمى ولم تنسى ما فعله عندما اختطفت .. ظلت ممسكة به حتى رحلوا تمامًا ليبعدها هو عنه ويقول بعصبية :
_ أنا مش قولتلك متطلعيش ورايا
تمتمت بعدم خوف أو توتر :
_ وكنت عايزني اسيبك وحدك عشان تفقد اعصابك وتعمل مصيبة
هدأت ثورته قليلًا وأجابها بامتعاض :
_ طيب ادخلي جوا يلا
_ وإنت ؟!
اردف بنبرة عادية ولكن مازالت تحمل القليل من السخط :
_ هبقى آجي وراكي
لم ترغب في مجادلته كثيرًا فتنهدت بضيق وفعلت كما طلب ، اتجهت عائدة لداخل المنزل وهي تحمد ربها بأن لم تحدث مشكلة وتدعو ربها أن يحفظهم من شر عمها !! ……
***
انتظرته بالغرفة لدقائق طويلة ومرت نصف ساعة كاملة وهو لم يعد .. لا تراه في الحديقة الخارجية ولا تفهم إلى أين ذهب في ذلك الوقت ! ، فوقفت أمام النافذة تنظر تترقب عودته .. وأخيرًا بعد وقت طويل من الانتظار فُتح الباب ودخل هو فاستدارت بكامل جسدها ناحيته تهتف متذمرة :
_ كنت فين ياكرم ؟!
_ كنت قاعد في الجنينة من ورا بريح راسي شوية
رأت العبوس والخنق يعتل معالمه فتنهدت بإشفاق واقتربت منه تحتضن كفه بين كفيها هامسة بحب :
_ متعصبش نفسك ممكن !
ظهرت بشائر الابتسامة الحانية على شفتيه ثم هتف بضجر وقد تلاشت الابتسامة :
_ متعصبش إزاي يعني ياشفق إنتي مشوفتيش اللي حصل .. وليهم عين ياجوا لغاية بيتي وبذات ابن عمك الحيوان ده
أجابته برقة ولطافة تذيب القلب :
_ ميهمنيش اللي حصل الأهم إنك بخير ومحصلتش مشكلة وإن شاء الله متحصلش .. يكفيني وجودك ، وأنا هكون مطمنة ومرتاحة طول ما إنت جنبي
صعدت الابتسامة تزين ثغره وحدجها بأعين دافئة ومغرمة ثم احتضن وجهها وانحنى إليها يطبع قبلة عميقة على وجنتها هامسًا :
_ أنا دايمًا جمبك يا أميرتي
عيناها تتحدث بدلًا عن لسانها وتخبر بالكثير من سعادة وعشق وسكينة وهو يستطيع فهمها جيدًا ، وقع نظره على ملابسها التي بدلتها ولم تعد ترتدي الرداء الذي قام بشرائه لها.. لتتسع ابتسامته ويغمغم بخبث :
_مش مزاجنا بس اللي اتعكر لا كمان الليلة باظت .. يلا مش مشكلة تتعوض
ارتبكت عند ذكره ليلتهم وتذكرت ماحدث قبل أن يرن هاتفه فازداد توترها وتوردت وجنتيها لتتمتم بصوت مضطرب :
_ أنا هروح أنام تصبح على خير
وبلحظة واحدة ولته ظهرها وذهبت للفراش وتدثرت جيدًا أسفل الغطاء وصدرها يعلو ويهبط بقوة ، لحظات وشعرت به يرفع الغطاء وينضم إليها ثم يقترب منها ويلف ذراعه حول خصرها يضمها إليه من الخلف ويهمس بجانب أذنها في مداعبة ماكرة :
_ حظك كان حلو المرة دي بس المرة الجاية مفيش مفر مني ، لإني مش هسمحلك أصلًا
انفاسه الدافئة التي لفحت رقبتها جمدتها وسرت على أثرها قشعريرة في جسدها فالتزمت الصمت وسمعته يكمل بنفس النبرة :
_ أنا مدرك توترك وكسوفك وعامل حساب ده فهستني لغاية ماتحسي نفسك جاهزة بس موعدكيش إني هقدر اصبر كتير
حبس انفاسها بآخر جملة قالها ثم استرسل ينهي الكلام هامسًا بعد أن لثم رقبتها بقبلتين :
_ تصبحي على خير ياحياتي
ردت متلعثمة ومرتبكة بصوت يكاد لا يسمع :
_ وإنت من أهله
اغمضت عيناها تحاول الهرب من خجلها ومن وضعهم عن طريق النوم .. أما هو فظل مستيقظًا يتطلع إلى السقف وسرعان ماعبس وجهه من جديد ورسم الحدة والوعيد على محياه ، فإن حاول ذلك الرجل سواء هو أو ابنه مجرد الاقتراب منها فقط ، يقسم بأنه سيجعلهم يذوقوا العذاب أشكالًا والوانًا ……
***
اشرقت شمس يوم جديد …
داخل مقر شركة طاهر العمايري بأمريكا .
كانت يسر تتحدث مع أبيها في الهاتف كالآتي …….
_ أنا كويسة يابابا متقلقش
هتف طاهر مقتضبًا بحزم :
_ كلمت حسن إمبارح وقالي إنه عايز يصلح كل حاجة بينكم .. لو إنتي مش عايز ترجعي وتقعدي معاه يابنتي قوليلي وأنا مستحيل اخليكي تكملي وإنتي مش عايزاه
تنهدت بأسى لتجيبه بخفوت :
_ اطمن يابابا أساسًا هو ميقدرش يجبرني على حاجة .. وأنا لسا عند قرار الطلاق ووافقت اقعد معاه اليومين دول بشرط إنه يبدأ في اجراءات الطلاق واتفقنا .. متخفش عليا أنا بخير
سأل طاهر بترقب :
_ وهو وافق على الطلاق !!!
سمع همهمتها بأجل ليعقد حاجبيه باستغراب ثم رجح بأنه قد يكون اقنعها بموافقته فقط حتى يهيأ لها أنه ذعن لرغبتها في الطلاق . تمتم طاهر بنبرة حكيمة :
_ ماشي يابنتي طالما إنتي عايزة كدا .. خلي بالك من نفسك ولو حصل أي حاجة اتصلي بيا
_ حاصر يابابا مع السلامة
انهت معه الاتصال ووضعت الهاتف على سطح المكتب وهي تزفر بعدم حيلة ، باتت لا تعرف مالذي يجب عليها فعله .. هل تسمع لقلبها الذي لا زال يعشقه ويلح عليها في طلب واحد وهو اعطائه فرصة لعله يكون صادقًا حقًا ، أما تستمع لواقعها الذي يخبرها بأن لا طريق للنجاة وقد وصلوا إلى نهاية الطريق وكلاهما سيسلك طريقًا مختلفًا قريبًا .. وضعت كفها على بطنها تملس عليها برفق تسترجع بذاكرتها يوم معرفته بحملها ومالذي فعله لكي يتخلص منها هي وطفلها ، فقويت مشاعر البغض عليه وزاد إصرارها على الطلاق هامسة لنفسها وهي تنظر لبطنها :
_ إزاي منتظر مني السماح بعد كل اللي عمله .. هل هو متوقع إني هرجع اطمن على نفسي مع واحد مكنتش فارقة معاه أساسًا وكان عايزة يدخلني عملية إجهاض من غير مايفكر فيا أو اللي ممكن يحصلي .. كان عايز يقتل ابنه عشان هو مني بس ، مفكرش في يوم يعاملني كويس ومعاملة طيبة وأنا كنت بستحمل عشان حبي ليه .. ودلوقتي جاي بيطلب السماح !!
لمعت عيناه بوميض مرعب وهي تقول بوعيد :
_ متخفش ياحبيبي مش هسمحله يأذيك أو ياخدك مني أبدًا .. هخليه يشرب من نفس الكاس المر اللي كان بيشربني منه
في هذه اللحظة فتح هو الباب ودخل ثم اغلقه خلفه واقترب يجلس على المقعد المقابل للمكتب يجاهد في تمالك غضبه متمتمًا بهدوء مزيف :
_ طلعتي من غير ماتقوليلي ليه ؟
هدىت ببرود أعصاب واستهزاء :
_ بصفتك مين عشان أقولك !
بدأ غضبه يتفاقم ولحسن الحظ أنه مازال يتحكم به حيث قال وهو يصر على أسنانه :
_ جوزك ومن حقي امنعك من الخروج كمان لو عايز
_ بنسبالك بس ، لكن أنا عمري ماهشوفك زوج ليا لأن حسن بنسبالي مات من زمان وملوش وجود
ابتلع قسوتها في الحديث معه وهتف شبه منفعلًا :
_ مش عايز اشوفك مع راسل نهائي يايسر مفهوم ولا لا
قهقهت ساخرة تجيبه :
_ ماشاء الله من أول يوم مش بتلتزم باتفاقنا .. طيب أنا هفكرك تاني ، ملكش دعوة بيا أقعد مع مين ولا اطلع مع مين .. إنت مش هتمشي كلمتك عليا ياحسن باشا
انتفضت جالسة عندما رأته يضرب بكف يده في عنف على سطح المكتب صارخًا :
_ هتمشي يامدام .. أنا مستحمل كل طلباتك ومش برفضلك طلب واللي عايزاه هنفذه ، بس لغاية هنا وكفاية عشان متشوفيش حسن القديم .. تلتزمي حدودك مع أي راجل مش راسل بس ، وأنا حذرتك أهو اللهم إني بلغت اللهم فاشهد .. لو شفتك معاه تاني يايسر مش هكون مسئول عن اللي هعمله
لم يهمها أي شيء قاله سوى جملة ” حسن القديم ” لقد كانت للتو تفكر في اعطائه فرصة وتخوض صراع مع قلبها وعقلها ، وهو يقول بأنه قد يجعلها ترى الشخص الذي بغضته مجددًا ، هل هذا هو ندمه واعتذاره ورغبته في إصلاح ما افسده بعلاقتهم .
استقامت تصيح باندفاع واستياء :
_ لا اثبتلي ندمك فعلًا وإنك فعلًا عايزني اسامحك ، إنت أساسًا متغيرتش عشان توريني حسن القديم .. إنت لسا زي ما إنت ومش هتتغير ، فمتحاولش تضحك عليا بكلمتين لإني كل ما بقول ده بدأ يتغير فعلًا بتثبتلي العكس ، بكرهك ياحسن صدقني بكرهك وبكره انانيتك .. انت من بداية جوازنا مكنتش عايزاني واتجوزتني كتسلية مش اكتر لكن متقولش اني هددتك والكلام الفارغ ده لأنك لو كنت عايز تتصرف معايا كنت اتصرفت ، فمتقوليش دلوقتي إنك عايزاني بجد
ادرك فداحة الخطأ الذي ارتكبه فهو لم يكن يقصد قول هذا ، فقد قاده غضبه وغيرته لطرق مظلمة فحجب رؤيته عن الخطأ والصح ووجد نفسه يتفوه بكلمات لا يدري خطورتها !! .
استقام هو الآخر وتمتم بنظرات هدأت حدتها وحملت الأسف :
_ يسر أااا…….
صرخت بصوتها المرتفع وهي تشير بسبابتها على الباب :
_ اطلع برا مش عايزة اشوفك .. مش طايقة اسمع صوتك حتى ، بــــرا ياحــســن
لم يتحرك وظل بأرضه يطالعها بأعين تعتذر عن ماصدر منه فوجدها تبتعد وتندفع نحوه تدفعه بعنف وتضربه على صدره وكتفه وهي تصرخ بهستريا وأعين تلمع بالدموع :
_ اطـــلـــــع بـــــرا
رفع كفيه لأعلى وهو يتراجع للخلف متمتمًا باستسلام وبعض الدهشة من انفعالها البالغ :
_ تمام تمام هطلع خلاص اهدى
ظل يتراجع حتى وصل للباب وفتحه ليليقى عليها نظرة حزينة وأخيرة قبل أن يستدر وينصرف تاركًا إياها بين دموعها التي انسابت على وجنتيها !! …..
***
كانت تجوب بالغرفة إيابًا وذهابًا تنتظر خروجه من الحمام وهي تستشيط غيظًا .. لا تفهم سبب تصرفه بالأمس ولما يتدخل ويمنعها من استكمال دراستها ، ألم تسرد له كل شيء كما حدث واوضحت له أنها بريئة ولم تفعل شيء عن إرادة ولن تفعل حتى لو عاد بها الزمن ؟ .. ولكنه لا يصدقها رغم كل ماقالته ، ويراها فتاة فاسقة بإمكانها أن تفعل أي شيء يخل باسمه واسم العائلة !! .
وأخيرًا خرج من الحمام وهو يلف حول رقبته المنشفة المتوسطة فاندفعت نحوه غاضبة هاتفة :
_ أنا عايزة افهم إنت بتعمل كدا ليه ؟!
رفع حاجبه وسألها بعدم فهم حقيقي :
_ بعمل إيه ؟!!
_ ليه رافض اروح الكلية ياعلاء واكمل دراستي
ابتعد من أمامها وسار باتجاه المرآة يقف أمامها ويجفف شعره متمتمًا بجفاء وعدم اكتراث مزيف :
_ بتسألي اسئلة إنتي عارفة اجابتها كويس أوي ، وأظن الإجابة بسيطة جدًا وهي إني مش واثق فيكي وللأسف إنتي مراتي دلوقتي وأي حاجة هتعمليها هتمسني أنا
صاحت منفعلة باستياء :
_ أنا حكتلك كل حاجة وفهمتك وإنت مش واثق فيا لسا .. أنا يمكن غلطت في حجات كتير بس مستحيل اخونك ، ثم إن دلوقتي أنا أهم حاجة بنسبالي دراستي ومش هروح الكلية عشان اكوّن صدقات أو علاقات ، أنا رايحة ادرس
ابتسم مستنكرًا يتمتم بعدم ثقة :
_ وأنا إيه اللي يضمني إنك متعمليش حاجة !
أصدرت زفيرًا مرتفعًا وقالت بنفاذ صبر محاولة اقناعه :
_ إنت وديني الكلية وخدني منها عشان تتأكد بنفسك إني مش بعمل حاجة ولا بقعد مع حد .. حلو كدا ؟!
طال نظراته الجامدة وهو يفكر بالإذعان لها حتى وجدها تهتف راجية :
_ ارجوك ياعلاء وافق .. أنا بجد محتاجة جدًا أكمل دراستي ، مش عايزة اخسر دي كمان
استسلم أخيرًا وقال بصرامة وهو يلقي الأوامر والتعليمات :
_ طيب بس هيكون في قواعد وتعليمات لو كسرتي حاجة واحدة منهم مش هيعدي الموضوع من غير عقاب
هزت رأسها بالموافقة عدة مرات متتالية وهي تضحك بوجه عادت اشراقته :
_ تمام اؤمر باللي إنت عايزه معنديش مشكلة
بدأ يملي عليها التعليمات في حدة ونبرة حازمة لا تحمل التهاون :
_ هتجيبي هدوم جديدة وواسعة غير اللي معاكي لإن اللي معاكي مش عجباني ، جدول محاضراتك هبقى عارفه كله هتدخلي امتي المحاضرة وتطلعي امتي ، ممنوع الخروج من البيت من غير أذني .. مش هتتصاحبي على حد هناك تمامًا
قالت مندهشة بعفوية :
_ حتى البنات !!
رأت عيناه اظلمت وقال بصوت مرعب :
_ ليه وهو سيادتك كنتي ناوية تتصاحبي على رجالة كمان !
هتفت مسرعة تتلافى خطأها باعتذار :
_ لا لا مش قصدي .. أنا آسفة كمل متخفش هكون في حالي ومش هتكلم مع حد نهائي
هدأت نبرته ونظرته وتحدث هذه المرة بخفوت ولين قليلًا :
_ وأخيرًا بما إنك مش عايزة تخسري دراستك ومهتمة أوي بيها كدا ، يبقى مش عايز اشوف أي تقصير في المذاكرة لأن التقصير هيكون بعقاب أكيد
وجهها يبتسم ببشاشة بالغة وسعادة وهي توميء له بالموافقة على كل تعليماته الصارمة ، ليحدجها بنظرة فاحصة ودقيقة على فرحتها المفرطة ثم يستدير ويسير لخارج الغرفة ولكنها استوقفته هاتفة :
_ علاء
توقف والتفت لها برأسه فهمست هي مترددة بخوف بسيط :
_ ينفع صديقة واحدة ؟!
تقوسا حاجبيه وظهر الغيظ عليه لتتراجع هي فورًا تجيب بدلًا عنه بالإجابة التي قالها بشكل غير مباشر عن طريق معالمه :
_ لا مش كدا ! .. تمام خلاص أنا أساسًا مش عايزة اصاحب حد كنت بقول كدا بس
كانت تهتف بكلماتها هذه في امتعاض وضيق واضح كمن يقنع نفسه بأنه لا يريد الشيء حتى لا يحزن أكثر ، تنهد مغلوب على أمره وإذا بها تراه يرفع سبابته يقول من خلال حركته هذه ” واحدة فقط ” !
كانت على وشك الوثب قفزًا من فرط سعادتها فتمالكت نفسها وسيطرت عليها حتى رحل وانطلقت هي تصدر اصوات فرحة من بين شفتيها وحركات طفولية !!!
***
_ مــــلاذ
سمعت صوته من الخارج فاعتدلت في جلستها وغادرت غرفتها لتتجه له فتجده جالسًا على الأريكة هادىًا تمامًا .. اقتربت تجلس بجواره مهمهمة :
_ نعم يازين ؟!
انتصب في جلسته وطالعها مبتسمًا يهتف :
_ أنا حجزت الطيارة على بليل هنرجع القاهرة
ضيقت عيناها بدهشة وهدرت مستغربة :
_ بليل !! .. ليه ؟
لا يستطيع اخبارها بما ينوي فعله بمجرد رجوعه وهو تصحيح الخطأ الذي ارتكبه منذ عشر سنوات ، وأيضًا لا يستطيع الكذب ولا يحبه !! .
تمتم بتنهيد حار دون أن يكذب:
_ في كام حاجة عايز اعملها وكمان كفاية عشان ارجع اشوف الشغل والشركة
هزت رأسها بالموافقة بعبوس بسيط مغمغمة :
_ طيب مع إني كان نفسي نقعد شوية أكتر المكان هنا عجبني أوي
مد كفه وملس بانامله على وجنتها في لطف هامسًا بحنو :
_ معلش ياحبيبتي اعمل إيه بس .. أنا لو عليا مش عايز ارجع خالص بس مضطر ، إن شاء الله ربنا يسهل وقريب أوي نعوضها
ابتسمت بحب وتمتمت :
_ إن شاء الله
انحنى ناحيتها يطبع قبلة ناعمة على وجنتها ثم جذبها لصدره فاستقرت هي بين ذراعيه لدقيقتين حتى قالت باسمة باهتمام :
_ إنت متعشيتش اعملك أكل تاكل ياحبيبي
نفي بهدوء وتشدق يبادلها ابتسامتها :
_ لا مش جعان .. وأنا عايز اقعد معاكي شوية وندردش مع بعض
_ ندردش في إيه ؟!
_ إيه حاجة ياملاذي !
_ مفيش حاجة نــ….
توقفت عن الكلام فجأة عند تذكرها لبعض الأحداث فقالت مرحة بإشراقة وجه :
_ لا استني صح افتكرت حاجة حصلت معايا امبارح مسخرة
بدأت تسرد له موقفها المضحك الذي حدث معها وتضحك وهو يبادلها الضحك ولكن بقوة أقل ، فاستمرت جلستهم المرحة والدافئة لدقائق طويلة ما بين الحديث المعسول والمزاح والجدية ………
***
يسير باتجاه المطبخ وهو يفرك عيناه ليزيح عنهم آثار الخمول .. بعد أن سمع صوت طفيف من دندنتها مع نفسها في المطبخ ، وصل ووقف على الباب يتفحصها بتدقيق من اعلاها لأسفلها وهو يبتسم ، فكانت ترتدي منامة قطنية قصيرة بعض الشيء وترفع شعرها بعشوائية تثبته بمشبك للشعر وتتمايل يمينًا ويسارًا رقصًا على الحان الاغنية التي تتندنها .. استند بكتفيه على جانب الباب وعقد ذراعيه أمام صدره يتابعها بإعجاب وهي توليه ظهرها غير منتبهة لوجوده ، التفتت بجسدها للخلف على اطمئنان وهي لا تتوقف عن التمايل وإذا بها تطلق شهقة مفزوعة منتفضة في أرضها ، لتضع يدها على قلبها هامسة بزعر :
_ بسم الله
لم يتحرك من مكانه وبقى كما هو على وضعه يرمقها مبتسمًا بساحرية ، فضيقت عيناها وقالت بريبة :
_ كرم !! .. واقف كدا ليه ؟!
أخذ شهيقًا طويلًا وتحرك ناحيتها يقف مباشرًا أمامها وهو يقول غامزًا :
_ أصلي لقيت فراشة حلوة في المطبخ عمالة ترقص فقولت أما اتفرج عليها
اخفت خجلها بصعوبة وقالت مبتسمة بدفء :
_ صباح الخير
_ صباح الفل والياسمين
عادت توليه ظهرها لتكمل ما كانت تفعله وهي تتمتم برقة :
_ الحمدلله واضح إن مزاجك رايق شوية عن امبارح أو مش شوية ده كتير أوي
خطا خطوة إليها ليقف بجانبها متشدقًا بنبرة بدت لها غريبة :
_ وميبقاش رايق ليه ما أنا عارف كويس أوي هعمل إيه مع عمك ده
تركت مابيدها ونظرت له مختنقة وهتفت بنفاذ صبر :
_ كرم ابوس ايدك ماتعمل حاجة .. أنا أساسًا طبيعي قلقانة عليك ومش حمل عمي يأذيك لقدر الله
احتضن وجهها بين كفيه يقربه من شفتيه ليلثم وجنتها بقبلة قوية بعض الشيء كأنه يأكل خدها متمتمًا بنبرة متلذذة من قبلته :
_ متخافيش يا أميرتي مش هتحصل حاجة بإذن الله
صعدت الحمرة لوجنتيها من قبلته التي تكاد تكون عنيفة واشاحت بوجهها تثبته على الطعام الذي تحضره ثم قالت بترقب :
_ إنت رايح الشغل صح ؟!
_ أكيد
عادت بنظرها له تقول بأعين راجية :
_ خليك معايا النهردا متروحش
غضن حاحبيه وقال باستغراب :
_ ليه ؟!!



