رواية كاملة بقلم ندى محمود

ندى محمود

عقدت ذراعيها أمام صدرها مبتسمة بسخرية على طريقته المزيفة في الظهور ببراءة ، يستطيع خداع أي أحد ولكن هي تعرف داخله المنحرف فقالت وهي تلوي فمها مستهزئة :
_ إيه هو ؟

انحني على أذنها وهمس بعدة كلمات صدمتها .. هي كانت متوقعة أنه سيقترح اقتراح منحرف ولكن ليس إلى هذه الدرجة !! ، استحت واستاءت بذات اللحظة فبتلقائية منها ضربته بكفها على كتفه في غيظ هاتفة :
_ امشي ياوقح

كتم ضحكته بصعوبة وقال مازحًا بطريقة كوميدية وهو يهم بالانصراف :
_ براحتك إنتي الخسرانة

قوست ثغرها بقوة حتى لا ينفرج عن ابتسامة وقالت بحزم مصتنع :
_ برا ياحسن

ولاها ظهرها ورحل وهو يضحك وكذلك هي التي تركت حرية شفتيها لتفتر عن ابتسامة واسعة وهي تهمس بحياء بسيط :
_ وبيقولها ببجاحة مهو منحرف هيتكسف إزاي !!

***
نزل من السيارة وقاد خطواته الساخطة إلى داخل المنزل وهي تبعته بخطا متعثرة ومتوترة .. وجدته يقف بجواره الباب ينتظرها أن تدخل لكي يغلقه وفي عيناه تستقر نظرة قاتمة ، دخلت باضطراب ليغلق الباب بكامل الهدوء ويهتف في نبرة لا تزال شبه عادية حتى الآن :
_ أنا كلامي كان واضح جدًا لما قولتلك إنتي مش هتدّخلي وملكيش دعوة بالموضوع ده نهائي صح ولا لا ؟

أماءت له بالإيجاب وهي تجفل نظرها أرضًا لا تقوى على رفعهم إليه ، ليسترسل هو حديثه بسؤال صريح وصارم :
_ واللي حصل دلوقتي ده إيه ؟

لم تجد الكلمات التي ستبرر بها عن نفسها ففضلت الصمت وبقت ساكنة كالصنم لا تنظر له فقط تحدق بالأرض ، ولكن اجتاحتها نفضة عنيفة أثر صيحته القوية بها :
_ أنا بكلمك ياشفق ردي .. إيه اللي عملتيه ده ، كذبتي عليا وقولتيلي نازلة تشتري شوية حجات وروحتي لعمك الحيوان ده في بيته ، يعني مش كذبتي عليا وبس لا كمان عصيتي اوامري اللي هي لمصلحتك وعشان خايف عليكي ، إنتي إيه ضمنك إنهم ميأذوكيش عشان تروحليهم بنفسك

ادمعت عيناها بالدموع الحارقة وهي كما هي لا تنظر له .. مما استفزه هدوءها المبالغ فيه حتى أنها لا تحاول الدفاع عن نفسها لعل ضجره منها يهدأ قليلًا .
صاح بصوت جهوري :
_ متفضليش ساكتة كدا قولي إيه اللي وداكي هناك من غير ماتقوليلي .. هتفضلي لغاية امتي كدا عديمة مسئولية ومش بتفكري في نتائج اللي بتعمليه أنا بعمل كل حاجة عشان اخليكي في آمان ومفيش حاجة تأذيكي وإنتي اللي برجليكي بتروحي للأذي

اجهشت في بكاء عنيف وقالت بصوت مرتجف ومبحوح :
_ كفاية ياكرم من فضلك

سكت تمامًا واطال النظر في وجهها الغارق في الدموع فكاد أن يخر مستسلمًا أمامها ويعتذر منها ولكن يجب عليها أن تعرف خطأها جيدًا حتى لا تكرره مرة أخرى ، وسيتوجب عليه أن يكون أكثر صلابة أمام قلبه الذي ينخ لها من مجرد كلمة أو ابتسامة أو حتى لمسة ! .. اتاها صوته الغليظ وهو يقول بنبرة لينة قليلًا :
_ أنا كل اللي عايزك تفهميه هو خوفي عليكي ، وإنتي عارفة أنا بخاف من أن شعرة واحدة بس منك تتأذي ، وفاهمة إن عصبيتي أحيانًا مش بأيدي فارجوكي ياشفق اللي اقوله يتنفذ ومتكسريش كلمتي تاني مش عشان حاجة ده عشان مصلحتك لأن أنا مش همنعك من حاجة إلا وأنا عارف أنها ممكن تأذيكي .. كفاية عياط .. روحي اغسلي وشك وحقك عليا مقصدش ازعقلك كدا

رفعت نظرها له أخيرًا وطالعته بدموعها السابحة في عيناها مطولًا ثم استدارت ورحلت لتتركه يتأفف ويمسح على وجهه بزفير حار .. هو شخصيًا اصبح يتضايق من انفعاله المستمر على أقل واتفه الأشياء ، هو ليس برجل من هذا النوع .. ماذا يحدث له لا يفهم ! ، أهل هذا بسبب المشاكل التي تلاحقهم دومًا وتجعله دائم الخوف والقلق بشأن زوجته ؟ ، فتجعل منه سريع التحول والانفعال ! .. أم ماذا ؟! ، أي كان السبب فهو لا يعجبه هذا الوضع ويجب عليه أن يجد حلًا سريعًا له !! ………

***
في مساء ذلك اليوم ……
اتجهت هدى إلى الباب بعد أن سمعت صوت رنينه ، مسكت المقبض وادارته ثم جذبت الباب إليها لتقابل ” زين ” بوجهها ابتسمت بحنو وسعادة فانحنى هو ناحيتها وعانقها بدفء متمتمًا :
_ عاملة إيه ياست الكل وحشاني

نكزته في كتفه بتذمر مصتنع من ابتسامة محبة :
_ وحشاك إيه بس ياكذاب .. هو أنت فاكر حد أساسًا في الفسحة اللي اخدتها مع مراتك

دخل ونزع حذائه عنه مغمغمًا بمزاح وهو يضحك :
_ يبقى ظلماني كدا يادودو .. اخبار تيتا إيه ؟

_ كويسة الحمدلله طلعت يدوب من ربع ساعة تنام

دار بنظره في أرجاء المنزل متمتمًا :
_ امال رفيف فين ؟

_ في اوضتها فوق إنت عايزها في حاجة ولا إيه ؟

_ آه اندهي عليها عشان عايز اتكلم معاكم في موضوع كدا

عقدت حاجبيها باستغراب تجيبه بحيرة :
_ خير موضوع إيه ده ياحبيبي ؟!

_ خير إن شاء الله

فعلت كما طلب وذهبت لتخبرها بمجيء أخيها وأنه يريد التحدث معها ، فخرجت رفيف خلف أمها فورًا ورحبت بأخيها وهو كذلك ، ثم جلست بجواره على المقعد ، ليأخذ نفسًا عميقًا قبل أن يبدأ حديثه بجدية تامة :
_ اسلام اتكلم معايا النهردا وطلب إيد رفيف مني

الدهشة الأكبر كانت من نصيب هدى التي نقلت نظرها بين ابنتها وبينه باندهاش ، أما رفيف فلم يصبها من الصدمة بقدر والدتها وكان الأمر مفرح بالنسبة لها ، تصنعت الذهول أمام أخيها وكأنها لا تعرف بشيء وأخفت سعادتها ! .
زين بنبرة رزينة :
_ إيه رأيك يا ماما ؟

هدى بابتسامة عذبة :
_ والله ياحبيبي أنا على قد ما اندهشت بس فرحت يعني إسلام أنا عارفاه كويس أوي وماشاء الله عليه راجل ومحترم .. الرأى في الأول والآخر لاختك سواء موافقة أو رافضة

انتقل بنظره إلى شقيقته التي كانت شبه خجلة وتتابعهم بصمت ثم غمغم بحنو :
_ صلى استخارة ياحبيبتي وفكري وردي عليا .. ولا إنتي مش موافقة أصلًا من البداية ؟

هزت رأسها بالنفي وتمتمت بحياء بسيط :
_ هفكر واستخير ربنا يازين واقولك قراري إن شاء الله

ملس على كفها بلطف وهو يبتسم مهمهمًا :
_ إن شاء الله

***
اتجهت يسر إلى الباب بعد أن سمعت صوت رنين الجرس .. مسكت المقبض ووقفت لثواني قصيرة تبتسم بخبث ثم اخفت ابتسامتها بسرعة وفتحت الباب لتنظر له بسكون قبل أن يتحدث هو بريبة :
_ في إيه يايسر .. إنتي كويسة ؟

اماءت بالإيجاب وتجيبه زامة شفتيها للأمام :
_ إنت شايف إيه ؟!!

_ امال ليه اتصلتي بيا وبتقوليلي اطلعلي فوق بسرعة !!؟

استندت بكتفها على جانب الباب وقالت مبتسمة في برود مقصود وبنظرات ملتذذة :
_ أصل أنا جعانة واكتشفت أن الأكلة اللي هعملها في مكونات ناقصة ، وكنت عايزاك تروح تجيبهم ليا

رفع حاجبه مستنكرًا طلبها منه في هذا الوقت المتأخر :
_ دلوقتي !!!

اماءت برأسها وقد اتسعت ابتسامتها ولكنها اخفتها تدريجيًا واعتدلت في وقفتها وهي تقول باستياء مزيف :
_ أه دلوقتي بس لو مش عايز خلاص مفيش مشكلة

همت بالاستدارة فقبض على ذراعها يستوقفها هاتفًا :
_ خدي هنا استني هو أنا قولت حاجة .. قولي إيه اللي عايزاه يلا ؟

عادت ابتسامتها لشفتيها حيث اجابته باسمة وهي تملي عليه طلباتها التي تريدها .
لم تكن تريد شيء فكل شيء موجود لديها فقط فعلت ذلك كيدًا فيه ولتستمتع ! .. ظلت بانتظاره لدقائق طويلة حتى عاد وحمل الطلبات ووضعها في المطبخ فقالت بخفوت :
_ شكرًا

ثم بدأت في إخراج الطعام وبدأت في تحضير وجبة عشائها ، فرأته يقترب ليقف بجوارها ويهمس برقة تليق بصوته الرجولي :
_ مش محتاجة مساعدة ؟

هزت رأسها بالنفي وقالت في كامل الهدوء وهي مثبتة نظرها على الذي تفعله :
_ لا شكرًا ياحسن امشي إنت خلاص

ضيق عيناه بتعجب واجابها بمرح وأعين تنضج بالعشق :
_ امشي !! .. طيب اعزمي عليا حتى وقوليلي اقعد اتعشى معايا ياحبيبي ، أي حاجة .. بقى بزمتك مصعبتش عليكي من يوم ماجيت هنا وأنا نص أكلى من برا ، ده أنا حتى وحشني الاكل الحلو من إيدك ياحلو إنت

لم يسعدها كلامه هذه المرة بل ظهر العبوس على محياها عندما عكرت صفوها ذكرى سيئة من ذكرياتهم ، فابتسمت بمرارة وقالت مستنكرة آخر جملة :
_ وحشك !!! .. ليه مش على أساس أنا مبعرفش أعمل أكل وأنه قرف لدرجة إنك رميته في الزبالة ، فاكر ولا نسيت !

لم تنسى أي موقف جرحها فيه ، هي كانت تتناسى جميع مواقفه لكن بعدما ساءت علاقتهم لم تتمكن من التظاهر بالتناسي وكلما ترغب بمسامحته تتذكر أحد مواقفه القاسية معها فينمو بداخلها شعور الخوف من أن تعطيه الفرصة فتعود معاناتها من جديد ، والآن فقط هو فهم لماذا لا تسامحه بسهولة !! .
اجفل نظره بخزي من نفسه وتمتم معتذرًا بصدق وضيق :
_ أنا آسف.. عارف إني جرحتك كتير وكنت متخلف بس حقيقي أنا ندمان على كل حاجة قولتها وعملتها

بذلت اقصى مجهود في أن تتحكم في دموعها ، لكن انسابت على وجنتيها بحرقة وهي تأبى النظر له حتى لا يراهم بوضوح ، شعرت به يلف ذراعه حول كتفها ويضمها لصدره وباليد الأخرى مسك بكفها يرفعه لشفتيه ويلثمه بعدة قبلات ناعمة هامسًا بعاطفة جيَّاشة وحب :
_ أنا طلبت منك فرصة تاني عشان نبدأ من جديد وفي صفحة جديدة تمامًا ، واوعدك إني هخليكي تنسى كل حاجة وحشة ومش هتفتكري غير ذكرياتنا الحلوة مع بعض

تسمح له بلمسها لأول مرة منذ انفصالهم ، اغمضت عيناها براحة وسكينة وهي تشعر بدفء أحضانه .. اشتاقت له أكثر مما يتخيل حتى ، الآن فقط احست بأن روحها التائهة قد سكنت في جسدها ووجدت مستقرها ، ودت لو تبقى بين ذراعيه وهو يحتضنها هكذا للأبد لكي تعوض أيام فراقها عنه ، لكن سحبت نفسها منه بهدوء وجففت دموعها متمتمة دون أن تنظر له :
_ خلاص روح إنت وأنا لما اخلص الأكل هنزّلك منه

” فيما كنت اتحدث وبماذا تجيبين إنتِ !! ” قالها لنفسه مستنكرًا بضحك ثم هتف برفض وبمداعبة غامزًا :
_ تؤتؤ مش همشي أنا عايز اساعدك ياستي إنتي مالك الله

_ لا متساعدنيش

ضحك وهتف بكامل اللطافة :
_ خلاص هقف اتفرج عليكي

زفرت بنفاذ صبر وقالت بجدية :
_ قدامك حلين يا تنزل الشقة تحت ياتطلع وتنساني برا لغاية ما اخلص .. لكن متقفش معايا في المطبخ عشان مش برتاح

ابتسم ببساطة عندما فهم سبب رفضها لوجوده معها الذي سيوترها فغمغم باستسلام :
_ طيب هطلع اتفرج على التلفزيون في الصالة برا

ثم استدار وانصرف فتنهدت هي بقوة ولاحت على ثغرها ابتسامة مغرمة ومستكينة ! ……

***
ترجل من سيارته وقاد خطواته نحو المنزل ومن ثم صعد الدرج متجهًا إلى غرفته ، فتح الباب ودخل فرآها تجلس على الفراش بصمت وبيدها هاتفها تعبث به وتتصفح أحد مواقع التواصل الاجتماعي ، أصدر تنهيدة قوية ثم اغلق الباب ونزع عنه سترته هاتفًا :
_ جيتي إمتى ؟

اجابته باقتضاب دون أن تنظر له :
_ بعد العصر

جلس على حافة الفراش بجانبها وبدأ في نزع حذائه عنه متمتمًا بهدوء تام وكأن كل شيء لم يكن :
_ قاعدة صاحية ليه مش المفروض إن بكرا أول يوم كلية ليكي

رغم كل ماحدث ويتصرف بطبيعية ويلقي عليها الأوامر أيضًا بدلًا من أن يعتذر منها أنه لم يصدقها وجرحها بموافقته على ما طلبته الجدة في فحصها عند طبيب ليتأكدوا من عذريتها !! .
هدرت بسخط وعنادًا به لكي تغضبه :
_ لا ما أنا قررت إني مش هروح الكلية لإني هرجع المانيا وهكمل هناك في كليتي وده طبعًا بعد مانتطلق

نجحت بجملتين فقط في اثارة غضبه كما كانت تريد حيث التفت برأسه نحوها وقال بغلظة وحدة :
_ قولنا قبل كدا مليون مرة موضوع المانيا ده تنسيه تمامًا ، مفيش رجوع هناك حتى لو حصل واطلقنا

ميار بكل برود أعصاب وعدم اكتراث لما يخرج ما شفتيها :
_ وأنا بكرهكم مش عايزة اعيش معاكم ، وحقيقي أنت خلتني اندم إني حسيتك مختلف عنهم وهتقف معايا وهتدافع عني وهتصدقني بس طلعت زيهم مفيش حد عنده استعداد ياجي على نفسه شوية ويصدقني ، أنا مصدمتش في نينا النهردا قد ما اتصدمت فيك .. أنا عارفة إنك مش عايزاني وعايز تطلقني ومش بتحبني بس كنت متخيلة إنك صدقتني وطلعت غلطانة للأسف

اطرق رأسه أرضًا بوجه بائس لتهتف هي بصوت مبحوح :
_ ما تتكلم ساكت ليه ؟

أخذ نفسًا عميقًا ثم هتف بأسى :
_ لما تيتا قالتلي كدا أنا مقدرتش ارفض يا ميار .. كان لازم اوافق عشان اقضي على أي ذرة شك جوايا حتى لو أنا مصدقك ففي صوت جوايا بيفضل يشكنني فيكي ، فوافقت عشان اثبت لنفسي إنك على حق .. وعشان أنا كمان مش عايز يفضل الشك ده جوايا وعايز نكمل في علاقتنا بطريقة أفضل واحلى

قالت باستهزاء وهي تبتسم بحزن :
_ ليه وهو إنت عايز نكمل مع بعض !!!

لم تجد رد منه سوى الصمت فاتسعت ابتسامتها وأجابت بجفاء :
_ طيب أي كان ردك سواء بأيوة أو لا .. أنا مش عايزة أكمل ياعلاء وحتى مشاعري اللي كانت تجاهك مش عايزاها

صدمته بجملتها الأخيرة حيث ضيق عيناه مدهوشًا وهتف بترقب لردها :
_ مشاعرك تجاهي !!!

ادركت السذاجة التي تفوهت بها فلعنت نفسها الحمقاء ألف مرة وحاولت التهرب من سؤاله بقولها :
_ تصبح على خير

مدت يدها على الغطاء وهمت بسحبه علي جسدها لكي تتمدد وتخلد للنوم كوسيلة للهرب منه ولكنه قبض على رسغها هاتفًا بفضول :
_ قصدك إيه ياميار ، وياترى المشاعر دي كانت كره ولا حاجة تاني ؟

انفعلت ودفعت يده هاتفة بخنق :
_ مش قصدي حاجة ياعلاء .. أنا عايزة انام ممكن !

تمددت على الفراش وولته ظهرها فبقى هو بنفس وضعيته يحملق بها بشرود للحظات يفكر فيما قالتها ، ثم وقف واتجه للحمام لكي يبدل ملابسه بعدما لم يصل لإجابة على حيرته ! …….

***
انتهت من تحضير كوب القهوة الخاصة به .. لم يطلبها ولكنها فعلتها كاعتذار بسيط ولكي تجد سبب لتتحدث معه ، فهو منذ الصباح لا ينظر بوجهها ولا يتكلم معها ولم يعطيها مجرد ابتسامة رقيقة حتى !! .. هي مخطئة ومعترفة بخطأها وأيضٌا تضايقت من طريقته العنيفة وانفعاله عليها ، وبنفس ذات اللحظة تقول لنفسها أنه على حق فبالتأكيد قلق عليها وهي تعرف أنه لا يغضب هكذا إلا عندما يكون الأمر يخص سلامتها وخوفه عليها .. لم تعد تعرف اتعتذر له مباشرة أم تنتظر حتى يهدأ غضبه منها وستعود المياه لمجرايها !! .
وصلت أمام باب مكتبه وفتحته ببطء شديد ثم دخلت واقتربت منه لتضع الكوب على سطح المكتب أمامه ، رفع نظره لها وقال بجفاء غير متوقع منه :
_ أنا مطلبتش منك قهوة !

لوت فمها بيأس ثم التقطت الكوب مجددًا وهي تهتف بنبرة قوية :
_ آسفة

سارت باتجاه الباب وبينما هي في طريقها لتنصرف .. انزلقت قدمها عن غير قصد وسكبت القهوة عليها فتركت الكوب من يدها ليقع على الأرض ويتناثر لأجزاء وتصدر هي تأوهات متألمة بشدة .. هب واقفًا مذعورًا وهرول إليها يمسك بيدها المحروقة وملابسها التي تلطخت بالقهوة فيهتف بزعر :
_ مش تاخدي بالك ياحبيبتي .. وريني إيدك

رفع يديها ينظر إليهم فيرى أحمرار شديد وهي تتألم بشدة فهتف بقلق :
_ تعالي غيري هدومك بسرعة وهحطلك مرهم للحروق

سارت معه حتى وصلا للغرفة وبحث هو بالادراج عن المرهم حتى عثر عليه واخرجه ثم اقترب منها وتمتم :
_ تعالى هحطلك منه

التقطته من يده وهدرت بحزم بسيط وضيق ملحوظ في نبرة صوتها ونظرتها :
_ خلاص ياكرم روح أنا هغير هدومي واحطه

_ هساعدك مش هتعرفي تغير هدومك وإيدك كدا

_ لا هعرف متقلقش روح كمل شغلك

لم يعيرها اهتمام واتجه إلى الخزانة ليخرج منها ملابس لها ثم عاد ومد يده لبلوزتها يفك ازارها فابعدت يده هاتفة باستياء بسيط :
_ بتعمل إيه .. قولتلك هغير أنا و….

توقفت عندما لمست يدها يده فألمتها أكثر ومسكت بها تصدر أنينًا متوجعًا .. لوى فمه باستنكار وكأنه يقول ” لقد اخبرتك ! ” .
شفق بخفوت وهي تجذب من يده البلوزة :
_ هات أنا هغير

ولته ظهرها وأكملت فك الازار ونزعت ذراع البلوزة بحرص شديد حتى لا يؤلمها ولم يستمع لها رغم كل هذا حيث مسك بالملابس النضيفة وساعدها على ارتدائها ومن ثم اجلسها على الفراش وبدأ بوضع المرهم على الجزء المحترق في يدها ، فنسابت دموعها على وجنتيها بغزارة ليس بقدر تألمها ولكن بقدر حزنها من جفائه .. انتبه لها بعدما انتهى فعبس وجهه وهم بأن يتحدث فجففت هي دموعها فورًا وقالت بصوت مبحوح :
_ ايدي بتألمني أوي عشان كدا عيطت .. أنا هنام تصبح على خير

تمددت على الفراش بعد أن ارتدت قفازات على يدها موضع المرهم والحرق .. تنهد هو بعدم حيلة فقد فشل في الصمود أمام دموعها ولم يسمح له قلبه بأن يتركها تنام الليلة وهي تبكي .. مدد نصف جسده بجوارها وانحنى عليها من الخلف يطبع قبلة على وجنتها هامسًا بحنو :
_ معاش ولا كان اللي يخلي أميرتي تعيط .. متزعليش ياروحي أنا اتعصبت عليكي لأنك فعلًا غلطانة ومكنش ينفع تكسري كلمتي صح ولا لا ، ورغم إنك غلطانة هتنازل واقولك صافي يالبن بس بشرط إنك تصالحيني

التفتت له برأسها وقالت بعدم فهم :
_ اعتذرلك يعني ؟

قال باسمًا بلؤم وهو يغمز لها :
_ تؤتؤ الاعتذار ده كلام أنا عايز أفعال

فهمت مبتغاه المنحرف فتنهدت مغلوبة على أمرها واعتدلت في نومتها لتقترب وتطبع قبلة عميقة على وجنته هامسة برقة وحب :
_ أنا آسفة اوعدك مش هتتكرر تاني

ابدى عن رفضه لطريقه مصالحتها له حيث قال بضيق :
_ لا مش بتصالح بدي أنا

_ امال بتتصالح بإيه ؟!!!

وجدته يقترب منها فتراجعت برأسها للخلف هاتفة بحيرة :
_ هتعمل إيه ؟!

كرم بابتسامة عريضة :
_ هوريكي بتصالح إزاي عشان تصالحيني بيها

هزت رأسها بالنفي متمتمة بضحك :
_ لا مش عايزة اشوف خلاص بكرا هبقى اصالحك

قوس وجهه محتقنًا وهتف :
_ بكرا إيه هو النهردا يا بلاش .. هاا تختاري إيه ؟

عادت تتمدد على الفراش مجددًا مغمغمة بابتسامة خجلة :
_ يبقى بلاش احسن

اغتاظ بشدة فمد يده واطفأ الضوء وتشدق بوعيد حقيقي :
_ شكلك كدا مش هتاجي بالذوق

انطلقت منها ضحكة مرتفعة من بينها هتفت باسمه عندما اغار عليها ينل منها ما رفضت اعطائه ولكن على طريقته الخاصة !! ……

***
ملاذ بنبرة مرحة ومعاتبة أيضًا :
_ بقى كل ده يحصل ومحدش يقولي .. ماشي يا إسلام

_ ما أنا قولتلك أهو .. أنا كنت بس منتظر لغاية ما أكون متأكد وافاتح زين بالموضوع الأول وأهو كلمته

تصنعت الضيق والضجر وهي تجيبه :
_ إيه يعني قصدك إني كنت هقول لزين مثلًا !!

إسلام ضاحكًا بمشاكسة :
_ ده أكيد أنا عارف كدا .. من فرحتك مش هتقدري تمسكي لسانك فعشان كدا قولت لماما متقولكيش إلا لما اكلم زين

قهقهت بقوة ثم أجابته برزانة وبعض الجدية :
_ ده أنا طايرة من الفرحة .. واطمن أنا واثقة إن رفيف هتوافق إن شاء الله ياحبيبي

_ إن شاء الله

خرج زين من الغرفة ونظر لها باستفهام عندما سمعها تهتف بـ ” حبيبي ” فهمست دون أن يصل الصوت لمسمع أخيها :
_ إسلام

أماء بتفهم واقترب ليجلس بجانبها بينما إسلام فسمعته يهتف بنبرة عادية :
_ أنا هقفل بقى يازوزا عشان اروح انام معايا شغل الصبح بدري

_ ماشي ياحبيبي تصبح على خير وابقى سلملي على بابا وماما

انزلت الهاتف من على أذنها بعدما انهت اتصالها مع أخيها ، والتفتت للجالس بجوارها تقول بحماس :
_ إنت شوفت رأى رفيف ولا لسا

زين بخفوت :
_ كلمتها هتصلي استخارة وترد عليا بقرارها

ملاذ بعذوبة وفرحة غامرة :
_ خير إن شاء الله .. فرحانة جدًا والله بالخبر ده

لم ينتبه لحديثها فقد كان عقله مشغولًا بشيء آخر .. يشعر بنفسه كأنه تائه في وسط غاب ولا يدري أهو بأولها أو آخرها أو منتصفها ، لا يعرف حتى إيه طريق النجاة !! .
تعجبت من شروده وسكوته الغريب فاقتربت منه أكثر هامسة بريبة ونظرات تحمل الحيرة :
_ زين ! .. مالك إنت من وقت مارجعنا من الرياض وحاسة إن في حاجة مضيقاك ودايمًا ساكت وسرحان كدا ، احكيلي ياحبيبي

نظر لها وغمغم بابتسامة منطفئة :
_ مفيش حاجة مهمة ياحبيبتي .. مشاكل الشغل العادية

استندت بكلتا كفيها على كتفه وهمست بدلال انوثي ورقة :
_ طيب ولسا برضوا مش عايزني اروح لدكتورة

تنهد الصعداء بصوت مسموع وتمتم بكامل اللطف :
_ احنا مش اتكلمنا في الموضوع ده ياملاذ وقولتلك سيبه براحته وقت ما ربنا يريد هيتم

انتصبت في جلستها وابتعدت قدر سنتي مترات عنه متمتمة في نعومة امتزجت ببعض الجدية :
_ بس أنا مش مطمنة وخايفة يكون في مشكلة فعايزة اروح اطمن مش اكتر

لن تفهمه ولن يستطيع شرح موقفه لها .. وسيظل وضعهم هكذا هي تريد وهو لا يتمكن من اخبارها ، حتمًا لابد من وجود حل لهذه المعضلة قبل أن يصلا لمفترق طرق مغلق ! .
هب واقفًا وقال شبه مختنقًا :
_ اعملي اللي تعمليه ياملاذ مش فارقة

تابعته وهو يرحل شبه منذهلة من ردة فعله المعاكسة والعجيبة ، ماذا يقصد بافعلي ما تريدين ؟!! .. كأن الطفل الذي ترغب في انجابه سيكوت طفلها بمفردها وليس طفلهم معًا ! ، ألا يريد هو أيضًا طفل ؟ .. باتت لا تفهم تصرفاته الغريبة ولكنها بدأت تغضبها وتسأم منها !! ……..

***
دخل كرم في غرفة مكتبة الخاصة واغلق الباب خلفه لكي يستطيع التحدث براحة أكثر بعيدًا عن آذان زوجته ! .. أجاب على هاتفه وتحدث بنبرة عادية :
_ أيوة ياحسن

_ هااا اديني اتصلت بيك ممكن بقى تفهمني إيه اللي بيحصل !!

غمغم كرم بصوت رجولي أجشَّ :
_ اللي بيحصل إن كمال الحسيني حطلي حشيش في العربية عشان يلبسني تهمة وادخل السجن بس من ستر ربنا إن الموضوع عدى على خير ومحصلش حاجة

انطلقت من حسن ضحكة متغطرسة وهو يهتف :
_ حشيش مرة واحدة !! .. وده طبعًا بسبب شفق ؟

_ بظبط ومن الآخر كدا الراجل ده مش هيتهد إلا لما ودنه تتقرص كويس أوي ، وعشان عقلهم ميوزهمش بس إنهم يقربوا من مراتي

حسن بنبرة غليظة وحادة :
_ شكلهم محرموش من أيام سيف .. ماعلينا طالما الموضوع كدا هبقى اعمل اللي اتفقنا عليه واكلمك ، بس بلاش تدخل معاهم في مشاكل دلوقتي خالص ياكرم لغاية ما اخلص كل حاجة

هدر الآخر بنظرات شيطانية :
_ متقلقش هتسلى عليهم بس بشويش

ضحك بخفة وأجابه مازحًا :
_ يلا ربنا يرحمهم بقى بما إنك ناويت عليهم

***
بعد مرور ثلاث أيام ………
خرجت رفيف من غرفتها عندما رأت مجيء أخيها من الشرفة .. حسمت قرارها وستخبر أخيها عنه ! .
وقفت على آخر الدرج تنظر لهم كانوا يتبادلون الأحدايث بمرح كُل من الجدة وهدى وزين ! ، تحركت بخطواتها تجاههم ورحبت بأخيها ثم جلست على أحد المقاعد تنضم لهم .. تأخذ نفسًا عميقًا قبل أن تبدأ في حديث الذي كان كالآتي :
_ زين أنا صليت استخارة الحمدلله وفكرت كويس و…..

توقفت عن الكلام ودارت بنظرها بينهم جميعًا فرأت علامات الاستفهام تعلو محياهم ، تحدث زين بصلابة :
_ وموافقة ولا لا ؟!

……………… نهاية الفصل …………..

#ندى_محمود(( ضروب العشق ))

_ الفصل السادس والثلاثون _

لاحت على ثغرها ابتسامة مستحية وهي توميء له بالإيجاب متمتمة :
_ موافقة

ثبت زين نظره عليها وهو يبتسم بطريقة عجيبة وكأنه كان يعرف بأنها ستوافق ، أما أمها فعانقتها مغمغمة بفرحة بالغة :
_ مبرووك ياحبيبتي

تحدثت الجدة ضاحكة :
_ البيت هيفضل علينا بس ياهدى قريب

مسكت هدى بكف الجدة وهي تقول مازحة :
_ وماله أهو هنسلى بعض ياماما .. دول حتى كانوا دايمًا معلين الضغط عليا

انفجر كل من رفيف وزين ضاحكين .. وهمست رفيف محدثة أخيها مستنكرة ما قالته أمها :
_ شايف بتكذب عيني عيني قدامنا .. امال مين يادودو اللي أول مامشيوا ولادك فضلت تعيط وتقول البيت فضى علينا واخواتك هيوحشوني

نكزتها هدى في كتفها ومالت عليها تهمس بمرح ومشاكسة :
_ بناكل عيش قدام جدتك يابت

ازداد ضحكها وهي تقول ضاحكة :
_ آه بتثبتي تيتا يعني

شاركتهم الجدة في الضحك وقالت بحدة مزيفة :
_ محدش له دعوة ببنتي تقول اللي هي عايزاه .. يلا قومي روحي شوفيلك حاجة تعمليها وإنت كمان قوم روح لمراتك خليني اكمل كلامي مع امكم

زين بضحك بسيط :
_ تسلمي ياست الكل على الطرد المحترم ده

تبادلوا الضحك جميعهم في جلسة عائلية لطيفة دامت للدقائق قصيرة .. مابين المرح والجدية والضيق على أمور أخرى ! …….

***
داخل شركة طاهر العمايري بأمريكا …….
كانت تجلس على مقعدها أمام المكتب وتتابع أعمالها فسمعت صوت طرق الباب لتهتف سامحة للطارق بالدخول .. فتح راسل الباب ودخل ثم اغلقه خلفه واقترب منها ليجلس على المقعد المقابل لها متمتمًا :
_ عاملة إيه يايسر ؟

رفعت نظرها له وقالت بعذوبة وابتسامة عريضة :
_ إيه يا راجل عاش من شافك .. ليك تلات أيام مش بتاجي !! ، إيه اللي حصل ؟

هتف بصوت مختنق :
_ كنت مخنوق شوية ومحتاج اقعد وحدي ، فاخدت اجازة كام يوم .. قوليلي إيه اخبار الشغل في غيابي ؟

يسر بتلقائية تمامًا :
_ زي الفل كل تمام وحسن كمان موجود وكان بيساعد معايا كتير

عبس وجهه أكثر عند سماعه لاسم ” حسن ” فغمغم بنبرة شبه ساخرة ومنزعجة :
_ إيه إنتي خلاص قررتي هترجعيله بعد كل اللي عمله ؟!

تنهدت الصعداء بيأس وهدرت بعدم حيلة :
_ حاولت ياراسل اتجاهل صوت قلبي بس مقدرتش .. وحاسة بجد إنه ندمان وعايز يصلح اللي حصل بينا ، والصراحة أنا أول مرة في حياتي اشوف حسن بالمنظر ده ، وده خلاني اصدق أنه اتغير فعلًا

اخفي ابتسامة مريرة ودت بالخروج على شفتيه وهتف بنبرة قوية :
_ قولتي ليه إنك لسا حامل ولا لسا ؟

هزت رأسها بالنفي في ضيق وخرج صوتها نادمًا :
_ لا ، بس أكيد هقوله .. هو فكرة إني على اخبي الكل دي كانت غلط من البداية ، لأن مهما حاولت اخبي في الآخر برضوا الموضوع هيتكشف ، وأنا حاليًا بفكر إزاي هقول لباب وماما وعلاء والكل إني مسقطتش زي ما هما فاهمين

_ قوليلهم وأنا واثق إن عمي وخالتي هيفهموا وضعك حتى لو اضايقوا منك بس هيفهموا بعدين .. بس الأهم إنك تكوني متأكدة من قرارك عشان متندميش للمرة التانية بعدين !

يسر بثقة تامة وابتسامة خافتة :
_ اطمن المرة دي مختلفة معتقدش إني هندم .. أنا حساك مضايق ؟!!

بالطبع منزعج .. ولكن كيف يخبرها بأنه معجب بها بشدة وكان يود عدم تراجعها في قرارها وأن تتم احراءت طلاقهم تمامًا لتحين هو فرصته ويعرض عليها الزواج !! .
راسل بسخط :
_ لازم اضايق يايسر أنا من وقت ما قولتيلي وأنا حايش نفسي عنه بالعافية ، رغم إن إنتي اللي غلطانة من البداية ومكنش ينفع توافقي تتجوزيه أصلًا وخايف عليكي دلوقتي منه أنه يكسرك تاني ، بس طالما إنتي متأكدة من قرارك خلاص

حدجته بأعين دافئة ومحبة لتهتف بمشاعر نقية :
_ متقلقش عليا وحسن مش وحش بالمنظر اللي إنت متخيله بيه ده .. هو يمكن حيوان وغبي وحجات كتير جدًا بس صدقني هو من جواه كويس أوي وأنا واثقة من ده .. عرفت بقى ليه إنا ليه مكنتش عايزة احكيلك عشان كدا بس إنت اللي اصريت لما بدأت تشك في الموضوع ، بس حقيقي ياراسل أنا مش عارفة اشكرك إزاي على وقفتك معايا ربنا يعلم إني بعزك وبحبك زي علاء بظبط ، ربنا يخليك ليا

تجاهل آخر جملها حتى لا ينزعج أكثر وتمتم بنبرة جادة :
_ طيب أنا بكرا نازل مصر هاخد فترة هناك وهقف مع عمي طاهر في الشركة لأنه محتاجني هو وعلاء

يسر بابتسامة صافية وناعمة :
_ توصل بالسلامة يارب

_ أمين .. أنا همشي بقى عشان في كام حاجة ورايا عايز اخلصها

هزت رأسها بالموافقة له وهي لا زالت تحتفظ بابتسامتها اللطيفة ، فوقف هو وسار باتجاه الباب ولكن قبل أن يخرج فتح حسن الباب وتسمر بأرضه فاخذت معالم وجهه معالم صارمة ومشتعلة وهو يتطلع به ، أما راسل فقد اقترب منه وانحنى على أذنه يهتف بوعيد حقيقي :
_ احمد ربك إنها ادتك فرصة وإنت متستهلهاش أساسًا ، بس أعمل حسابك إنك لو عملتلها أي حاجة أو جرحتها هتلاقيني أنا في وشك ياحسن

رمقه حسن بأعين نارية ومميتة لا تبشر بالخير مطلقًا ، لاحظت يسر ذلك وخشت من أن يقع شجار بينهم فهرولت باتجاه زوجها الذي كور قبضة يده بعنف ووضعت كفها الرقيق على يده كوسيلة لتهدئته واعطت لراسل ابتسامة واسعة تودعه بها عندما القى نظرة أخيرة عليها قبل أن ينصرف .
نظر حسن على يدها الممسكة بكفه بعد رحيله فنزعتها فورًا وانتصبت في وقفتها ، خرج صوته الرجولي الغليظ وهو يهتف بغضب :
_ بيقول إيه ده ؟!!

يسر بنبرة شبه عادية :
_ ولا حاجة ما أنت عارف إن راسل مش بيحبك

صاح منفعلًا :
_ عرف إزاي باللي حصل بينا يايسر !!!!

لم يخيفها صياحه مطلقًا بل ازعجها حيث قالت بكل ثبات :
_ أنا حكيتله

_ نعم !!! ، ازاي يعني حكتيله ؟!!!

يسر ببرود تام وعدم مبالاة باستياءه :
_ حكيلته ياحسن .. هو شك وأصر إني اقوله فحكيتله وراسل أنا بثق فيه وعمره ماهيتكلم ولا هيقول حاجة ، بعدين إنت مضايق ليه فيها يعني لما اقوله

حسن بصياح جهوري :
_ فيها كتييير ياهانم بصفته إيه ده عشان تحكيله على مشاكلنا واسرارنا

طفح كيلها فانفعلت هي الأخرى وصرخت به بعصبية :
_ متزعقليش فاهم ولا لا

ثم اندفعت إلى خارج الغرفة تمامًا وتركته يشتعل من الغيظ !!! ……

***
عبرت سيارته بوابة المنزل وكان يتحدث في الهاتف مبتسمًا بتشفي :
_ أيوة هو ده الشغل .. تعجبني كدا ياسامح ، تعالى بكرا في الشركة عشان نتكلم على راحتنا اكتر

سامح ضاحكًا بشيطانية :
_ ده مش بعيد تجيله سكتة قلبية لما يعرف اننا اخدنا منه الصفقة دي

كرم بنبرة تحمل الوعيد :
_ عشان يعرف أن كرم العمايري ميتلعبش بالنار معاه

_ نتقابل بكرا بقى يادنجوان ، سلام

انهى معه الاتصال وأوقف السيارة بمكانها المخصص في الحديق ونزل منها وعلى ثغره لا تزال ابتسامة ماكرة تزين ملامحه ، تمتم لنفسه متوعدًا بنارية ” هو لسا شاف حاجة مني !! ” .
قاد خطواته باتجاه الباب ثم وضع المفتاح في القفل وفتحه ليدخل ويغلقه خلفه ، لم يكن بالمنزل سوى صوت التلفاز فسار ناحية غرفته وصاح مناديًا عليها عندما لما يجدها :
_ شفق إنتي فين ؟

احس بكفيها على كتفه من الخلف .. فالتفت بجسده كاملًا لها ، وأمعن النظر بها بتدقيق .. ترتدي بلوزة بحمالات من اللون الاسود واسفلها بنطال قصير من نفس اللون وتركت العنان لشعرها الأسود الحريري ، هو لا يزال عند رأيه بأنها تملك جسد أنوثي صارخ يجعله لا يتمكن من مقاومتها .. ارتفعت على شفتيه ابتسامة خبيثة وهو يتطلع إليها بجراءة ، وجدها تلف كلتا ذراعيها حول رقبته وتقف بمياعة مع نبرة صوت بها غنج أنوثي ودلال مغري :
_ عايزة طلب صغنن أوي من الكوكو بتاعي

ضحك بخفة وأجابها بمداعبة :
_ أه طاب ما تقولي كدا من الأول ولا هو لازم الدخلة دي

انزلت يد من حول رقبته وجعلت تعبث باناملها في قميصه وتهمس برقة مثيرة :
_ أنا زهقانة وعايزة اخرج النهردا ومتقوليش معاك شغل لأن الشغل مش أهم مني صح

انحنى برأسه ناحيتها يخطف قبلة ناعمة من جانب ثغرها متمتمًا بحب :
_ مفيش حاجة أهم منك بالنسبالي ياحبيبتي ، ومقدرش ارفضلك طلب أساسًا ، هاخدك ونطلع بليل إن شاء الله بس بعدين هنروح عند ماما عشان كلمتني وقالتلي نروح نقعد يومين معاهم

وثبت بفرحة غامرة وعانقته بحميمية ثم قبلته من وجنته هاتفة بسعادة طفولية :
_ ربنا يخليكي ليا ياكوكو وميحرمنيش منك ولا من حنيتك عليا

اشار إلى وجنته الأخرى هامسًا بلؤم :
_ وحدة هنا كمان

فعلت بدون تفكير وطبعت قبلة قوية وعاطفية فضحك هو وأخذ حصته حيث قبلها من جبهتها بحنو ثم ابتعد عنها واتجه للحمام ……….

***
تابعها من داخل السيارة وهي تسير ناحيته ، كانت غائصة في الملابس الفضفاضة والمحتشمة التي اختارها هو بنفسه ، الآن هو لا ينكر أنها اعجبته بشدة في مظهرها الجديد هذا ! .
وصلت إليه واستقلت بجواره وهي تلوى فمها باقتضاب ، تجاهل قسماتها الغريبة وقال بهدوء ورفق :
_ إيه أخبار أول يوم ؟

ميار بسخرية ونبرة محتقنة :
_ فظيع بشكل مش قادرة اوصفلك كنت مبسوطة إزاي .. هو مش باين عليا ولا إيه ؟!

تمالك نفسه بصعوبة وأجابها بضحكة مكتومة :
_ لا باين الصراحة !

تشدقت بضجر حقيقي :
_ مفيش حاجة تضحك إنت جبتني الكلية بالغصب وأنا قولتلك إني مش عايزة اروحها

تجاهل كل ما قالته وتصرف ببرود وكأنه لم يسمع شيء ولم يلاحظ سخطها ، انطلق بالسيارة ورمقها بطرف عينه هامسًا بابتسامة خفية :
_ شكلك حلو على فكرة في الهدوم دي

هدأت قسمات وجهها المتقوسة بغضب لتأخذ معالم الدهشة والحياء بنفس اللحظة وتشيح بوجهها للجانب الآخر لتخفي توترها .. فلاحظ ارتباكها وابتسم بخفة ثم هتف بنبرة دافئة :
_ تحبي نروح نتغدى برا النهردا

_ نتغدى برا !!! .. وإيه المناسبة ؟!

علاء ضاحكًا :
_ وهو لازم يكون في مناسبة ياميار ، أنا حابب نطلع مع بعض

ضيقت عيناها باستغراب منه ، بل واصابها الذهول من آخر كلماته الجديدة تمامًا !! ، هل هو من يرغب في البقاء معها على انفراد وفي وجبة غذاء منفردة في أحد المطاعم !!! .

***
مع غروب شمس ذلك اليوم وارتفاع ضوء القمر في السماء ، كانت تجلس بشرفة غرفتها وتلف حول ذراعيها شالًا من الصوف يدفئها من البرد القارص ، تتأمل النجوم الساهرة بابتسامة خفية ونفس مطمئنة ومستكينة .. وكف يدها على بطنها تتحسسها بلطف ، تفكر لتتخذ القرار المناسب وتختار الوقت واليوم الذي ستخبره فيه بأمر الطفل وأنها لازالت تحتفظ به ، فليس هناك طريق آخر للكذب مجددًا ، وستضطر قريبًا بأخبار عائلتها بكل شيء ولكن يجب أن يكونوا مستعدين جيدًا لردة فعل أخيها وأبيها لكي يواجهوا الوضع بصمود وثبات ! .
سمعت صوت رنين الباب فتنهدت بعمق ووقفت حتى تذهب وتفتح له ، فتحت الباب ورمقته بنظرات ممتعضة تدل على انزعاجها منه بسبب شجارهم بالصباح ، لم يكن هو بحاجة لشرح هذا حيث فسر تعابير وجهها وعرف السبب فدخل واغلق الباب خلفه ، استدارت وسارت عائدة إلى غرفتها فلحق بها بخطوات عادية حتى وصل خلفها إلى الشرفة واستندت هي بمرفقيها على السور فوقف بجوارها وتأمل السماء كذلك ، جعلت تنظر له بريبة وتتساءل في قرارة نفسها ” إذا لم يأتي ليعتذر مني عن طريقته القاسية معي بالصباح ، فلماذا جاء إذًا ؟!! ” قرأ معالم
وجهها المتعجبة فابتسم واعتدل في وقفته ليصبح مواجهًا لها ويقول مبتسمًا بحنو :
_ أنا فعلًا جاي اعتذر بس مش بالكلام

_ امال بإيه ؟!

قالتها بابتسامة متغطرسة ليمسك بكفها ويجذبها معه للداخل هامسًا :
_ يلا ندخل الأول بس جوا عشان الجو برد وهقولك

سارت معه والفضول يأكلها لمعرفة كيف سيعتذر لها ، تابعته وهو يغلق باب الشرفة ويقترب منها ليقف أمامها مباشرة ثم يمد كفه في جيب بنطاله ويخرج علبة مستطيلة حمراء ويفتحها أمامها ، حدقت بالعقد الذي قام بشرائه في ذهول .. فهو نفسه العقد الذي رأته عندما خرجا معًا لشراء الملابس وقالت له أنها كان لديها واحد يشبهه تبقت لها ذكرى من جدها ولكنها فقدته .
علت الابتسامة الرائعة والجميلة إلى شفتيها تدريجيًا ثم مدت كفها ببطء والتقطته ، تارة تنظر له بإشراقة وجهها الساحرة وتارة تنظر للعقد ، فرأته يمد كفه له يطلب أن تعطيه العقد .. فعلت على الفور دون تردد والتف هو ليقف خلفها فتمد يدها وتأتي بخصلات شعرها على الجانب حتى يتمكن من لفه حول رقبتها ، لحظات عابرة وكان قد عقده حول رقبتها ثم أعاد هو بيديه خصلات شعرها إلى وضعهم الطبيعي على ظهرها واقترب منها أكثر ثم انحنى بوجهه على شعرها يشم رائحته التي اذابت باسواره . اغمضت عيناها تستلذ بانفاسها الدافئة التي تلفحها وتُشعرها بالطمأنينة والراحة ، سمعته يهمس بنبرة هائمة وابتسامة مغرمة لمستها في صوته :
_ تعرفي إني بحب ريحة شعرك جدًا ، هتجن وأعرف بتحطي فيه إيه !!

ضحكت بصوت مسموع والتفتت بجسدها كاملًا له وهتفت بمداعبة :
_ لا دي أسرار بنات مينفعش تطلع لجنس الذكور

هتف بضحكة مستنكرة :
_ لا والله .. ماشي ما علينا أي كان اللي بتعمليه فيه استمري لأنه بيني وبينك ريحة شعرك بتجنني وو …..

قاطعته بابتسامة ونظرة مصتنعة الحدة عندما ادركت بأنه سيبدأ في وقاحته المعتادة :
_ ميرسي ياحسن على السلسلة !

_ حسن حاف كدا .. مفيش حبيبي !!!

وقفت بغنج واقتربت منه تهمس بدلال انوثي :
_ ميرسى ياسُنسُن

اجابها بقرف :
_ إيه سُنسُن دي !!!!

اكملت بدلال أكثر :
_ خلاص حسونتي حلو كدا

انحنى عليها بوجهه وهو يغمز بلؤم ويهمس بنظرات ذات مغزى :
_ إنت كلك على بعضك حلو أصلًا ياحلو ، ماتجيبي بوسة !

فغرت عيناها بصدمة وتلونت بحمرة الخجل مع ابتسامتها المستحية التي انطلقت على شفتيها ثم ضربته على كتفه بخفة وهتفت بضجر مزيف امتزج بحيائها :
_ وقح .. ومش بتفكر غير في الحجات دي !

ثم تركته واندفعت لخارج الغرفة فرفع كفيه مستغربًا وهو يهتف بصوت عالى حتى تسمعه :
_ وهو أنا المفروض افكر في إيه يعني مع مراتي ؟!!

اصدرت ضحكة مرتفعة وصلت لأذانه وهي تجيبه من الخارج :
_ متفكرش خالص ياحسن .. صدقني كدا أفضل !

شاركها الضحك من مكانه ثم لحق بها للخارج ليكملوا أحاديثهم المرحة والغرامية !! ………..

***
توقف بالسيارة عند تل جبلي كبير بأحد الأماكن التي تعد صحراء ، تلفتت حولها باستغراب وسألته :
_ إيه المكان ده ؟! .. وليه جيت بينا هنا ياكرم ؟!!

كرم ببساطة وابتسامة دافئة :
_ عشان نتكلم شوية مع بعض على رواق قبل ما نروح عند ماما

أماءت بتفهم ثم اعتدلت في جلستها لتصبح مواجهة له وتقول بمشاكسة محببة لقلبه :
_ وياترى بقى الكوكو بتاعي عايزانا نتكلم في إيه ؟!

تنهد بعمق ثم أجابها بنبرة جادة :
_ حجات كتير ياشفق يعني أنا حاسس إننا منعرفش حجات كتير عن بعض ، عايزاك تحكيلي كل حاجة وأنا كمان احكيلك .. مش عارف بس حسيت إني محتاج استفرد بيكي في مكان زي كدا ونتكلم براحتنا في الحلو والوحش

سكتت لبرهة من الوقت تفكر في موضوع تبدأ به الحديث ثم هتفت بخفوت :
_ طيب أنا كان في حاجة كدا كنت حابة اسألك عنها من وقت جوازنا

اعتدل في جلسته أكثر واصبح مواجهًا لها ينتظر منها أن تسأل ، لتأخذ هي نفسًا عميقًا وتسأله بنظرات بائسة :
_ إنت لما قررت تتجوزني كانت رغبتك إنت فعلًا وعشان عايز تحميني زي ماقولت وإني أكون قدام عينك علطول ولا السبب كان حاجة تاني

اتخذت ملامحه التعجب من سؤالها ، ليبتسم كنوع من تلطيف الجو ويهمس :
_ وهي هتفرق في إيه كانت رغبتي أو لا مش الأهم دلوقتي أنا إيه !

شفق بنبرة خافتة ومصرة :
_ مش هتفرق بس أنا حابة أعرف

تنهد الصعداء بعدم حيلة وتحدث في نبرة شبه جادة ولكن بأعين تطلق شرارات العشق :
_ الحقيقة لا .. مش هقول إني اُجبرت لإن الإجبار بيبقى على حد إنت مش طايقه ، لكن أنا دايمًا كنت بعزك وبحبك ، اللي اقترح فكرة الجواز دي ماما وأنا رفضت في البداية بس هي فضلت ورايا عشان تخليني اوافق وبقت تعمل تصرفات أنا بستغرب منها ولما ودتك تقعدي في بيتنا القديم كانت حركة منها عشان تخليني اقلق واخاف عليكي واعرف إن عندها حق وإنك لازم تكوني معايا دايمًا وهي فهمتك إني سافرت بس أنا كنت قالب الدنيا عليكي وهتجن بسبب إني مش عارف روحتي فين .. في النهاية شكيت إنها ممكن تكون تعرف مكانك فروحتلها ورفضت تقولي مكانك إلا لما قولتلها إني موافق اتجوزك و………

قاطعته بسؤالها المبحوح وعيناها التي تلمع بالدموع :
_ مكنتش عايزني ليه ؟!!

لاحظ عيناها الدامعة فلعن نفسه الحمقاء التي سردت لها تفاصيل من المفترض أن لا تقال .. مد اناملها وملس على وجنتها بحنو ثم رفع كفها لشفتيه وقبَّل ظاهره برقة هامسًا بحب :
_ مين قال إني مكنتش عايزك ياحبيبتي .. أنا السبب الوحيد اللي خلاني رفضت في البداية إني خوفت اظلمك معايا وأنا وقتها كنت لسا متعلق بأروى جدًا ، فمكنتش حابب اخليكي تعيشي مع واحد ممكن ميقدرش يحبك ، بس الحقيقة إنك قدرتي بكل سهولة تاخدي قلبي وتعلقيني بيكي يمكن اكتر منها كمان

اشاحت بوجهها للجانب الآخر وفرت دمعة من عيناها ليخرج همسها الحزين وهي تجيبه :
_ لو كنت اعرف إن الموضوع كدا مكنتش هوافق ، أنا توقعت إن دي رغبتك أنت مش حد اجبرك عليا .. ولا هتفرق في إيه أصلًا صح سواء كانت رغبتك أو رغبة مامتك في كلتا الحالتين إنت اجبرت بينك وبين نفسك عليا

_هو لو ده معناه إجبار بنسبالك فهو بنسبالي أحلى إجبار في حياتي ، ولو رجع بيا الزمن تاني كنت هختارك برضوا

عادت بوجهها إليه ورمقته بأعين دامعة امتزجت بالغرام ليبتسم لها بعشق جارف ويقترب منها بوجهه يطبع قبلة طويلة على جانب ثغرها متمتمًا بتغزل ومرح :
_ حتى وإنتي بتبكي حلوة يا أميرتي ، مع إني مش فاهم إيه سبب العياط يعني إنتي زعلانة على إن واحد حمار ومتخلف كان عايز يضيع من إيده فرصة مش هتجيله تاني ، ده حتى أنا هروح ابوس إيد ماما وأقولها ربنا يخليكي ليا ياست الكل ودايما كدا تجبريني على الجوازات الحلوة

رمقته بنظرة مشتعلة وهتفت بغضب :
_ نعم !!!!

قهقه بقوة وانتقل للوجنة الأخرى يقبلها منها ويهدر من بين ضحكه بلؤم :
_ وهو برضوا في واحدة تقدر تملي عيني غير أميرتي وحبيبتي

منعت ابتسامته من الظهور بصعوبة وهي تبتعد بنظرها عنه في شيء من الشموخ ليعود هو لجلسته الطبيعية ويهتف ضاحكًا :
_ طيب أنا بقول نمشي احسن لإني شكلي اخطأت في موضوع إننا تتكلم لأنه قلب نكد من أول موضوع للأسف

_ يعني أنا نكدية ياكرم ؟!!

نظر لها وهتف بجدية مزيفة ونظرات بدت له حادة قليلًا في البداية وسرعان ما تحولت إلى مرحة في آخر الكلام :
_ أيوة نكدية ياشفق أنا هكدب عليكي يعني .. من ناحية النكد فإنتي مش بتضيعي فرصة عشان تعيطي ، بس برضوا بحبك والله وبحب نكدك وخلتيني احب النكد .. تخيلي كدا !! ، تعرفي إني كنت قلقان عليكي الفترة اللي فاتت اكمنك مكنتيش بتنكدي عليا بس دلوقتي أنا الحمدلله اطمنت عليكي وإن مراتي لسا بخير

تشدقت بنبرة لينة بعض الشيء لكنها متضايقة :
_ وإنت شايف إن اللي قولته ميضايقش يعني

كرم بنبرة رزينة ودافئة :
_ على قد ما أنا شايف إن يضايق طبعًا بس في نفس الوقت ميستهلش لأن خلاص ده ماضي ودلوقتي أنا مقدرش ابعد عنك للحظة واحدة وبحبك فوق ما تتصوري فليه نبص للماضي ونزعل نفسنا عليه خلينا في الحاضر والمستقبل اللي إن شاء هيكون كله نسخ مصغرة .. هااا فاكرة ؟

قال آخر جمله بابتسامة خبيثة مع غمزة وقحة من عيناه فتضربه هي بخفة على كتفه مبتسمة باستحياء :
_ بطل قلة أدب

_ ده أنا كدا محترم اصبري بس لما نروح البيت عند ماما واستفرد بيكي في الأوضة لوحدنا هتشوفي قلة الأدب على حق وهــ…..

احمرت خجلًا وهتفت بضحكة مرتبكة تمعنه عن استرسال كلامه :
_ كـــرم ، كفاية خلاص

كتم ضحكته بصعوبة وحرك محرك السيارة لينطلق بها متجهًا إلى منزل والده ، وهي بقت تنظر له بين الحين والآخر وتبتسم .. بقدر ما ازعجتها الحقيقة إلا أنها فرحت لأنه لم يخفي عليها واخبرها بها كاملة ، ربما هو لديه الحق في أن الماضي يجب أن يدفن مع الماضي ولا نعكر صفو حاضرنا به ؛ حتى لا نكون قد خسرنا الماضي والحاضر والمستقبل !! ….

***
انتهت من تسريح شعرها أمام المرآة وكانت تلقي عليه نظرة دقيقة بين الحين والآخر ، حتى استقامت واقتربت لتجلس بجواره على الفراش هامسة برقة :
_ زينو

كان يثبت نظره على حاسوبه الذي ينهي عليه بعض الأعمال ، فأجابها بنبرة عادية :
_ نعم ياحيبيتي

التصقت به وغمغمت في ابتسامة عريضة :
_ أنا حجزت عند الدكتورة والمعاد بكرا الصبح .. هتروح معايا أكيد مش كدا ؟

ترك مابيده وهو يزفر مغلوب على أمره ويقول بوجه مقتضب :
_ برضوا عملتي اللي في دماغك يعني !!

باتت لا تفهم سبب رفضه لوجود طفل ، بل وبدأت تنزعج حقًا وتغضب من طريقته وعدم اهتمامه وكأنه لا يريد على عكسها !! .
ابتعدت عنه قليلًا وهتفت بضجر بالغ :
_ زين إنت مش عايز تجيب مني أطفال ولا إيه ؟!!!

عقد حاجبيه بدهشة من تفكيرها العجيب وهتف شبه مستنكرًا ما قالته :
_ إيه اللي بتقوليه ده !! .. أكيد عايز يكون عندنا أطفال ياملاذ

_ امال فيه كل ما افاتحك في موضوع الدكتورة تقلب وتتعصب ، إنت إيه اللي مضايقك مش فاهمة ؟!!

التقط كفها وملس عليه بكفه الآخر في حنو متمتمًا وهو يثبت نظره في عيناها ويرمقها بأعين عاطفية :
_ حبيبتي أنا بس مش عايز نستعجل وبراحتنا وقت ما ربنا يريد هيجي الطفل .. ثم إني لسا مشبعتش منك ولما ياجي البيه هياخدك مني فخلينا نستمتع شوية قبل ما يشرف

جذبت يدها من بين كفيه ووثبت واقفة تهتف بانزعاج تام وشك ملحوظ :
_ دي حجة عشان تلهيني عن حاجة إنت مخبيها عني .. أنا حاسة إنك فيه حاجة مش طبيعية ليك فترة ومش عايز تتكلم ولا تحكيلي ، وده شيء بيعصبني اكتر يازين إنك شايل في نفسك ومش عايز تشاركني ، والله اعلم بقى إيه السبب الحقيقى اللي مخليك رافض نجيب أطفال دلوقتي .. بس مسيري هعرف متقلقش

ثم استدارت واندفعت لخارج الغرفة تمامًا وتركته يمسح على وجهه وهو يتأفف مستغفرًا ربه ، ضميره يقتله بكل لحظة وكل ثانية أنه يخفي عنها الحقيقة ولكنه لم يملك الشجاعة بعد ليحكي لها كل شيء دون خوف من ردة فعلها !! ………

***

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى