رواية كاملة بقلم ندى محمود
ندى محمود

تلقت الرد منه بالصمت وهو يحدجها بحيرة من ردة فعلها ، بينما هي فجعلت تشاهد صورهم كلها وهي تبتسم بعدما فهمت لماذا اغلقه بمجرد دخولها عليه المكتب ! ، تمتم كرم بشيء من الريبة ليوضح لها الأمر أكثر :
_ كنت بتفرج على صوري أنا وسيف الله يرحمه ، ولقيت صورنا أنا وهي في نفس الملف
همست بعذوبة وصوت يفيض رقة وحنانًا مع ابتسامتها اللطيفة التي تحمل القليل من المكر :
_ إنت كنت فاكر إني لما اشوف صوركم هضايق وهغير ؟!
ران عليه السكون يطالعها بترقب لحركتها القادمة بعد ردها الغريب ، بالفعل استقامت وتحركت خطوتين بعيدًا عنه حتى تضع الحاسوب على سطح المكتب ثم عادت له وجلست على حجره تلف كلتا ذراعيها حول رقبته مهمهة بصوت رحب وأعين دافئة وصافية :
_ أولًا أنا مش من حقي امنعك إنك تحبها وعارفة إنها وحشتك ، ومش من حقي ازعل منك .. ثم إني أكيد مش هغير من واحدة ميتة .. إن جيت للحق أنا شخصيًا لما بتاجي على بالي احيانًا بتصعب عليا وبعذرك ، الطريقة اللي ماتت بيها بشعة ، بالأخص وأنا متخيلة اللي حست بيه وقتها .. كم الخوف والرعب ومشاعر كتير مش هعرف اوصفها لكن كلها أنا حسيت بيها لما حاول الحيوان ده يقرب مني مش بس يلمسني ، ولولا إن ربنا نقذني الحمدلله وإنت كنت معايا وقدرت تحميني منه كنت ممكن أكون ميتة زيها دلوقتي .. صدقني أنا اكتر واحدة فهماك ياكرم ، فمتخفش تحكيلي أي حاجة مهما كانت .. وكن متأكد إني هفهمك صح وهتلاقيني جمبك وبساندك
لمعت عيناه بوميض العشق النقي ، فهي كما وصفها بالضبط ( طوق النجاة ) .. ربما لن تصدق إذا أخبرها أنه أحيانًا يظنها ليست حقيقية ، ذهنه يوهمه بأفكار ساذجة حول الملاك غير البشري الذي ارسله الله له ليخرجه من محيط أحزانه .. قد تكون أفكار سخيفة وحمقاء لكنه رغمًا عنه يتخيلها هكذا كلما يفكر في نعيم الحياة التي يعيشها مع امرأة لا يوجد لها مثيل بين كل نساء العالم في نظره !! .
تمتم بنبرة هائمة ومسلوبة السيطرة :
_ إنتي إزاي كدا ؟!!
ابتسمت بحب وهمهمت ببساطة :
_ إزاي كدا عشان لو كنت إنت مكاني مكنتش هتتصرف بالشكل ده يعني ؟!
_ أكيد مكنتش هستحمل فكرة إن في مكان لراجل غيري في قلبك حتى لو كان ميت
رفعت كتفيها لأعلى بريبة وهي تضحك بخفة وتجيبه بعذوبة وصوت لين به براءة يعشقها :
_ معرفش أنا إزاي كدا ياكرم .. اروى هي الوحيدة اللي مبغيرش منها ممكن اغير لو شفتك مع أي واحدة تاني لكن هي لا ، بالرغم من إني عارفة إنها لسا مستحوذة على جزء من قلبك
لحظة عابرة مرت بعد توقفها عن الكلام وهي تطالعه بغرام ، ثم وضعت كفها على منطقة قلبه واستكملت حديثها بمشاعر جيَّاشة :
_ بس يمكن ده عشان أنا كمان عارفة مكانتي في قلبك فين بظبط ، ومتأكدة إنك لو كنت بتشتقالها قراط فأنا عشرة ، ولو بتحبها فأنا بتعشقني .. يعني من الأخر أنا مرتاحة لإني ضامنة عرشي في قلبك وإن لا يمكن تعتلي العرش ده ملكة غيري
اتسع بؤبؤي عيناه وهو يثبته عليها كدليل على السيل الجارف من المشاعر التي تتملكه الآن ، أو بالمعنى الأدق هو الخادم الذي يخر خاضعًا ومطيعًا أمام ملكة عرشه التي أثرته كليًا ، ليس عاطفيًا فقط بل ذهنيًا وجسديًا أيضًا .. همس بصوت خافض وذائبًا :
_ شفق هو إنتي حقيقية ؟!
انفرجت شفتيها في ابتسامة واسعة لتلتصق به أكثر وتهدر بدلال مغري :
_ إنت شايف إيه !!
كرم بصوت يقطر حبًا وحنانًا وبنظرات كلها رومانسية جميلة :
_ أنا شايف ملاك قدامي .. ربنا بعتهولي من السما ، وشايف اجمل ست في الوجود لدرجة إني مش قادر استوعب إن اللي بيحصل معايا ده حقيقي ، إنتي لما بتكوني في حضني وجمبي بحس باحساس غريب وكأن بين ايديا الكون كله .. بكون في قمة سعادتي لما اشوف ضحكتك ولم نكون مع بعض ..
أنا سألتك السؤال ده قبل كدا وهسأله تاني دلوقتي .. إنتي عملتي فيا إيه ياشفق ؟
تلألأت الدموع العاشقة في عيناها فانحنت عليه واستندت بجبهتها على جبهته تجيبه بهمس اشبه بلحن غرام مميز وهي مغمضة عيناها :
_ حبيتك !
كلمة واحدة كان لها دورها في هدم جميع اسوار صموده أمام كتلة الجمال الصارخ هذه ، ليخر مهزومًا مستسلمًا لعواطفه المتيمة وشهواته تجاهها .. سمعت همسه الرجولي والمتملك يقول :
_ أميرتي
فتحت عيناها ورفعت جبهتها من عليه لتسلط عيناها على خاصته في لحظات مرت كالسهم قبل أن يأخذها معه ويبحر بها في عالهم الخاص .. مختسلين الوقت من الزمن لينعموا بلحظات رومانسية ليست الأولى ولا الأخيرة ……
***
نزع القميص عنه ثم التقط التيشرت المنزلي وارتداه ، وهي كانت جالسة على الفراش تتفحص هاتفها بتركيز .. بينما هو فانتهي من تبديل ملابسه واقترب ليشاركها الفراش هاتفًا بفضول :
_ هااا قوليلي بقى عملتي إيه مع ماما ؟
ميار بهدوء تام :
_ اتكلمت معاها
_ اتكلمتي معاها إيه ياميار ..ده إنتي لسا كنتي مكلماني وبتقوليلي هروح واحاول اصلح علاقتي بمامتك ، مش معقول بالسرعة دي ، ياشيخة ده أنا فكرتك عملتيلها عمل ولا حاجة !!
قهقهت ببساطة وتركت الهاتف من يدها ثم اعتدلت جالسة لتصبح في مواجهته تمامًا وتهمس برزانة :
_ لا مفيش سرعة ولا حاجة ياعلاء .. إنت عارف مامتك كانت بتكرهني إزاي ولما كنا قاعدين في البيت معاها حاولت كذا مرة اتكلم معاها واخليها تحبني معرفتش وكنت بفشل .. بس المرة دي تقدر تقول اتصرفت بذكاء معاها وقدرت اكسبها
غمغم علاء بعدم فهم ونظرات مستنكرة :
_ أيوة برضوا ما أنا مفهمتش إنتي عملتي إيه ولا قولتيلها إيه ؟!
غمزت بعيناها في لؤم أنوثي تجيبه برفض :
_ لا ملكش دعوة بقى قولتلها إيه .. دي حاجة بيني وبينها
هتف ساخرًا رافعًا حاجبه :
_ لا والله !!
نكزته في كتفه بخفة وهي تهتف ضاحكة بمداعبة :
_ خلاص بقى ياعلاء ، إنت شاغل دماغك ليه مش المهم إننا اتصالحنا خلاص والمشاكل اتحلت
_ تصدقي عندك حق .. أنا مالي بمواضيعكم دي ما تعملوا اللي تعملوه ، ابعدي كدا وفسحي شوية خليني انام
تراجعت بجسدها للخلف في الفراش وهي تجيبه بتعجب :
_ افسح !!
لم يعيرها اهتمام وسحب الغطاء على جسده ثم مد يده لكبس الكهرباء ليطفأ الضوء ، فتلفتت هي حولها في الظلام الداس الذي كسا الغرفة بأكملها ، أصدرت تنهيدة حارة ودخلت اسفل الغطاء معه لتعانقه من الخلف هامسة بأنفاسها الحارة التي لفحت عنقه :
_ علاء أنا عايزة أنام في حضنك طيب
هدر بنبرة عادية دون أن يفتح عينه أو حتى يلتفت لها :
_ بكرا بكرا ياميار .. مش كفاية لازقة في ضهري زي الجرادة !
لوت فمها بتذمر وغيظ ، فضربته على ذراعه بشبه قوة وهتفت وهي تبتعد عنه وتوليه ظهرها :
_ إنت أصلًا بارد .. أهو بعدت عنك نام واشبع نوم
فتح عيناه وبقى على وضعه ينتظر أن يسمع أي حركة أو صوت منها لكنها سكنت تمامًا ، مما أكد له أنها تضايقت كثيرًا حقًا .. تأفف بعدم حيلة واستدار بجسده ناحيتها ليجده متمددة بجواره وتوليه ظهرها ، اقترب منها وفعل مثل فعلت عندما عانقته من الخلف وهمس معتذرًا بلطافة :
_ متزعليش مكنش قصدي والله .. أنا كنت بهزر وإنتي اخدتي الموضوع بجد وزعلتي !
تملصت من بين محاصرته لها وابعدته عنها متشدقة بقرف مصتنع :
_ لو سمحت متلزقش فيا زي الجراد عشان مبحبوش وبخاف منه
كركر بصوته الرجولي عاليًا وعاد يجذبها إليه مجددًا وهو يقول مشاكسًا إياها :
_ ماهو الجراد لما بيمسك في حاجة مش بيسبها بسهولة ، وأنا خلاص مش هسيبك
ميار بوجه عابس ومختنق :
_ ابعد ياعلاء عشان بجد أنا مضايقة مش بهزر
دغدغها في أعلى وسطها فانتفضت بمكانها وهتفت بنظرة منذرة تتصنع من خلالها الحدة المزيفة وهي تكتم ابتسامتها :
_ لا بص اوعى !
انكمشت على نفسها حتى لا تدع له مساحة ليكي يدغدغها فيها ولكن قوته الجسمانية فاقت جسدها الناعم ، حيث اغار عليه يدغدغها بيديه الأثنين في أماكن متفرقة من جسدها ودفن وجهه بين ثنايا رقبتها يلثمها وهي تتلوي بين يديه محاولة التملص منه وتضحك بهستريا صائحة به :
_ بس ياعلاء خلاص ابوس إيدك مش قادرة والله .. علااااء
انفجر هو الآخر ضاحكًا على ضحكها الهستيري ورغم ذلك لا يحررها من بين براثينه !! …..
***
في تمام الساعة العاشرة صباحًا من يوم جديد …..
كانت تقف أمام المرآة وترتدي حجابها ونقابها بعد أن انتهت من ارتداء ملابسها بالكامل ولم يتبقى سوى حجابها .
الأمر أصبح ليس مطمئنًا أبدًا ، فمنذ صباح الأمس وهي تحاول الوصول له ولكن هاتفه مغلق ، مما جعل الشك والوساوس السيئة تجد طريقًا للولوج إلى ذهنها ، تتساءل عن سبب عدم عودته ! ، هل عرف بأنها عرفت الحقيقة ويخشي أن يأتي حتى لا يواجهها ؟! ، أم لديه أسبابًا أخرى ؟ ، أو أنه أصاب بمكروه ؟ .. وهذه كانت أكثر فكرة ترعبها !! .
فتحت أمها الباب ودخلت لتندهش بها وتهتف بريبة :
_ رايحة فين ياملاذ ؟!
ملاذ بخوف يعتيلها وقلق :
_ ماما زين تلفونه مغلق من إمبارح وأنا هتجن من القلق عليه .. هروح عند طنط هدى يمكن يكونوا عارفين أو اتصل بحد من اخواته
_ وهو هيتصل ياخواته وأمه وميتصلش بيكي ليه يعني ياملاذ .. ماهو أكيد هيطمنك زي ماهيطمنهم ، ارتاحي يابنتي واتصلي بيهم من البيت هنا اسأليهم .. متتعبيش نفسك وإنتي حامل لتأذي نفسك وابنك
اجابت بإصرار :
_ معلش ياماما خليني اروح بنفسي .. كدا هرتاح أكتر ومتخافيش عليا أنا كويسة ومش هتعب نفسي
قالت أمها بنفاذ صبر من عنادها :
_ طيب استني هقول لأخوكي يوصلك متروحيش وحدك
_ لا لا أنا هروح وحدي بعدين إسلام متفق مع خطيبته هيروح يشوفها .. بلاش اخره على معاده مع رفيف ، يلا مع السلامة
سحبت حقيبة يدها واندفعت إلى الخارج لتغادر المنزل بأكمله ، فتقف أمها بمكانها مسلوبة الحيلة وهي تزفر بقوة ! …
***
داخل مقر شركة عائلة العمايري ….
طرق عدة طرقات خفيفة على الباب ولم يدخل إلا عندما سمع صوته الغليظ يسمح للطارق بالدخول ، خطي إلى داخل الغرفة واغلق الباب خلفه بهدوء تام .. وكان طاهر نظره ثابت على الاوراق التي أمامه فهتف بصوت جاد بعدما ظن أن الذي دخل هو ابنه :
_ هااا ياعلاء عملت إيه في اللي قولتلك عليه ؟!
أخذ حسن نفسًا عميقًا واخرجه زفيرًا متهملًا باضطراب ، وهو متصلب بمكانه لا يصدر أي صوت ينتظر من عمه أن يرفع عيناه عن الورق ، وبمجرد ما أن رفعها ورآه تهجمت ملامحه وتقوست لتأخذ ملامح الغضب .
عاد يخفض نظره للورق مجددًا وهو يهتف بصرامة واستياء :
_ إنت لسا ليك عين تاجي تقف قدامي !!
تنهد حسن الصعداء واقترب خطوتين نحو مكتبه وهو يقول بندم صادق :
_ عمي إنت في مقام بابا الله يرحمه بنسبالنا ، وصدقني مش هقدر اخسرك لا إنت ولا علاء .. أنا آسف سامحني .. عارف إن اللي عملته ملوش مبرر ومتستاهلش تسامحني عليه ، بس والله أنا ندمان وعرفت غلطتي وعقلت وفهمت ولا يمكن اغلط غلطة زي دي تاني
طاهر بجفاء وعصبية :
_ اوعي تفتكر إني خلاص نسيت موضوع الطلاق عشان يسر عايزاك .. أنا لسا عند قراري
حسن بشجن ويأس :
_ أنا كلمتك لما كنت في امريكا .. ولو فاكر قولتلك إني بحب مراتي ومش هطلقها ، عندي استعداد احلفلك على المصحف إني لا يمكن أذيها تاني وإني هشيلها في عيني وقلبي .. أنا عرفت قيمة يسر ياعمي ولا يمكن اعمل حركة غبية تاني تضيعها مني
هب طاهر واقفًا وهو يصرخ به بانفعال :
_ بعد كل اللي حكيته لينا مستني مني استأمنك على بنتي تاني إزاي !!
حسن بنبرة رخيمة وبوعيد رجالي حازم :
_ عندك حق تخاف عليها مني .. بس اديني فرصة أخيرة واوعدك إني هكون قد الثقة المرة دي ومش هخون الإمانة تاني مهما حصل
استقرت في عينان طاهر نظرة مريبة وثاقبة كالصقر ، مع قسمات وجه قاسية دون ان يجيبه بأي شيء !! …
***
قادت هدى خطواتها في الردهة الطويلة المؤدية إلى الباب .. وصلت وفتحت لتجد ملاذ أمامها فتستقبلها بوجه بشوش هاتفة :
_ ملاذ ! .. أهلا يابنتي ادخلي
دخلت وتجولت بنظرها في الأرجاء لتتأكد من عدم وجود أحد ، بينما هدى فاغلقت الباب خلفها وتمتمت مبتسمة :
_ ارفعي النقاب محدش موجود اطمني
رفعت عن وجهها النقاب ونظرت لها تهدر بابتسامة عذباء :
_ عاملة إيه ياطنط وحشاني والله
_ وإنتي اكتر ياحبيبتي والله .. حمدلله على سلامة إسلام
_ الله يسلمك
تساءلت هدى بحسن نية وبنبرة طبيعية تمامًا :
_ امال زين مجاش معاكي ليكي .. ليه اسبوع مسافر وكان قايلي إنه لما يرجع هياجي يشوفني
اختفت ابتسامة ملاذ تدريجيًا بدهشة وقالت بعبوس وارتيعاد :
_ هو متصلش بيكي أو بكرم أو حسن حتى ؟!!!
ضيقت هدى عيناها وقالت بقلق مشابه لها بعدما احست بأن هناك شيء سيء حدث :
_ لا متصلش .. ليه هو في إيه ؟!!!
مسحت ملاذ على وجهها متأففة بيأس واتجهت نحو الأريكة لتجلس عليها وتهتف بصوت متلقلق :
_ زين مرجعش مع بابا وإسلام .. قالهم إنه معاه شغل وهياجي وراهم وميعرفوش حاجة عنه وأنا من إمبارح بحاول اوصله وتلفونه مغلق .. هتجن من الخوف عليه ، قولت اجي هنا يمكن يكون كلمكم
انقبض قلب هدى زعرًا ، وتسارعت دقاته برعب جلي .. حيث أجابتها بوجه خُطف لونه ونبرة مزعورة :
_ شغل إيه ده اللي معاه هناك ، أنا فكراه رجع من امبارح مع اخوكي وابوكي وكنت مستنياه النهردا ياجيلي ، وهو لو معاه شغل فعلًا قافل تلفونه ليه ؟!!
_ ماهو هو ده اللي هيجنني .. ليه يقفل تلفونه لو معاه شغل فعلًا زي ماقالهم !!!
التقطت هدى هاتفها وقالت بقسمات مرتعدة وصوت ليس عاديًا مطلقًا :
_ لا لا في حاجة مش طبيعية .. زين مش بيقفل تلفونه أبدًا ، أنا هتصل بكرم اخليه يشوف اخوه فين ؟!!
***
فتح كرم عيناه على صوت رنين الهاتف المتكرر ، فتململ في فراشه متأففًا ونظر إلى زوجته النائمة بجواره فمد يده على الهاتف وكتم الصوت حتى لا يوقظها ثم اعتدل جالسًا والتقطت عكازه وسار إلى الخارج مجيبًا على الهاتف بهدوء :
_ أيوة ياماما
هتفت هدى بصوت مرتعد :
_ كرم اخوك متصلش بيك أو قالك حاجة
_ مين حسن ؟!
_ لا زين
أجابها بالنفي ونبرة مستغربة :
_ هو مش مسافر مع إسلام عشان العملية والمفروض يكون رجع إمبارح !!
هدى بخوف جلي وتوتر :
_ مرجعش ياكرم ومش عارفين نوصله .. تلفونه مغلق ومنعرفش بيعمل إيه ، قالهم معاه شغل هناك وهيرجع وراهم .. إنتوا ليكم شغل في بلجيكا ؟!
ابتسم كرم بسخرية وهتف بجدية بعد أن بدأ القلق بتسرب لأعماقه هو أيضًا :
_ شغل إيه ده بس ياماما اللي لينا في بلجيكا !! .. بصي متوتريش نفسك وأنا هكلم حسن وهنتصرف وهنشوفه فين ، أنا مستغرب والله !! .. اصل زين مش بتاع الحركات دي أبدًا !
هدى بنبرة متوسلة وصوت تخنقه العبارات :
_ لو عرفت توصله طمني عليه يابني متسبنيش على اعصابي ياكرم
_ حاضر ياماما هكلمك متقلقيش
اغلق الاتصال وانزل الهاتف من على أذنه وهو يزفر بلا حيلة وهو يتمتم :
_ اووووف يازين .. نفسي افهم بتعمل في نفسك كدا ليه !!
***
السماء غربت وهو لم يتصل بها حتى الآن ولم يعتذر حتى عن تأخره عن موعدهم !! ، اقسمت بين نفسها أنه عندما يتصل ستعنفه بقوة وستتشاجر معه ، فهذا ليس تصرف لائق أبدًا منه أن يتركها بانتظاره كل هذه الساعات وبالأخير لا يأتي ! ، وفوق هذا لم يكلف نفسه حتى ويتصل ليعتذر عن تأخره ويبرر لها موقفه !! .
هاهو الهاتف أخيرًا اعلن عن اتصال من أحدهم ، وبالتأكيد هذا المتصل هو .. هرولت ناحية الهاتف والتقطته لتقرأ اسم المتصل وكما توقعت ، اجابت عليه بمضض :
_ نعم
_ أنا آسف
قالها بدون أي مقدمات فقط تفوه بها بعفوية لتهتف هي بضيق وضجر شديد :
_ أسفك مش مقبول يا إسلام .. إنت كنت عارف إني قلقانة عليك لما كنت قي بلجيكا ومهنش عليك تطمني أو حتى تتصل بيا قبل ما ترجع تقولي إنك راجع ولما رجعت برضوا متصلتش بيا غير النهردا الصبح وقولتلي هتاجيلي في المطعم وهنقعد شوية ونتكلم ، عديتها وقولت مطعم مطعم مش مهم ، لكن إنك متعبرنيش وافضل مستنياك ومتتصلش تقولي حتى اتأخرت ليه كدا زودتها أوي !
إسلام بأسف حقيقي ونفس مختنقة :
_ أنا عارف إني لو قولت أنا آسف من هنا للصبح مش هتكفي يارفيف .. بس احلفلك بإية إني كان معايا مشاكل وكنت مخنوق ومليش نفس اتكلم مع أي حد ، أو بالأخص معاكي إنتي لإني كنت خايف اعمل تصرف غبي أو اجرحك بكلمة من غير ما اقصد فحبيت ابعد شوية عنك لغاية ما اهدى .. والنهردا اللي عملته ملهوش مبرر عارف بس صدقيني حصل معايا ظرف طاريء واتأخرت ومكنش معايا شاحن والتلفون فصل شحن مني برا فمعرفتش اكلمك
سكنت تمامًا وانتباها الفضول بسبب ما قاله وسط كل هذا الكلام الكثير حول المشاكل وأنه لم يتصل بها هي تحديدًا بسبب مشاكله ، مما جعلها ترجح أن الأمر له علاقه بها بالتأكيد !! .
رفيف بصوت مترقب وجاد :
_ مشاكل إيه وليه تجرحني بالكلام ؟!! .. مش فاهمة قصدك ؟!
زفر الهواء بقوة من فمه فبالطبع لن يخبرها بأمر أخيها ، تمتم بخفوت وصوت رخيم مخترعًا شيئًا ليتهرب مما قاله :
_ قصدي يعني إني كنت مضايق وخوفت اكلمك وأنا مضايق فاقول حاجة من غير ما احس واضايقك مني
رفيف بصوت مقتضب وواضح عليه الانزعاج :
_ اممممم ماشي يا إسلام أنا هقفل عشان عايزة أنام
هدر هو معتذرًا للمرة الثالثة بندم :
_ رفيف أنا آسف ارجوكي مـ…..
قاطعته بلهجة صارمة وجفاء :
_ مش زعلانة يا إسلام خلاص حصل خير ، تصبح على خير
ولم تنتظر رده حيث انهت الاتصال فور انتهائه من كلامها ، بينما هو فانزل الهاتف من على أذنه وهو يحدق بشاشته في خنق ، ثم رفع كفه إلى وجهه ومسح عليه متأففًا .. لم يكن يقصد أن يتجاهلها كل هذه الفترة ولكنه حقًا كان منزعجًا من كل شيء ولوهلة فكر بأن يفسخ الخطبة وتراجع باللحظة الأخير ، وكان أفضل حل هو الابتعاد عنها حتى تهدأ نفسه الثائرة ، مثلما يفعل أخيها الآن بالابتعاد عن الجميع !!! …
***
في إحدى بقاع الأرض تحديدًا بدولة بلجيكا ….
الأشجار الضخمة والعشب يحاوطوه من كل جهة وأمامه مجموعة من الطوب وضعهم بجانب بعضهم ليشكلوا حلقة دائرية وفي نصف هذه الدائرة النار تعلو وتهبط كلما يعبث بها بالخطبة التي في يده ، وتزداد توهجًا وارتفاعًا عندما يلقي المزيد من الخطب بداخلها .
لا يعرف مالذي يفعله فهذه الأفعال ليست من شيمه ولكنه يشعر بالراحة هكذا ، الراحة في البعد عن الجميع حتى عن أحبائه !! .. فقد ادرك قيمة انفراده التي اعادت لنفسه الكثير مما فقدته ، اليومين الذي قضاهم مبتعًدا افادوه وجعلوا من روحه الثائرة والتائهة التي تدور في نفس المتاهة ولا تجد طريقها .. أن تسكن أخيرًا في مستقرها .
الانعزال عن الكل لفترة قد يفيد صاحبه وقد يؤذيه ، لكن الأهم هو عدم الإفراط في العزلة .. فقد تصبح مرضًا لك لن يداويه حتى لو تجمع كل من تعرفه حولك ليخرجونك من ظلمتك ، سيفشلوا ! .
نظر إلى يده وبالأخص اصبعه الذي يحمل خاتم زواجه ، اطال النظر فيه بشرود وهو يعبث بأنامل يده الأخرى في اصبعه والخاتم .. بالأخير اخرجه وقلّبه بين يديه أمام عيناه يمعن النظر فيه ثم القي به بين ثانيا النيران المتعطشة لأي شيء حتى تأكله !!! .
……………. نهاية الفصل ………..(( ضروب العشق ))
_ الفصل الرابع والأربعون _
( الأخـــــيـــــر )
فتحت شفق عيناها وتململت في الفراش بانزعاج من اشعة الشمس المتسللة إلى عيناها من النافذة ، لمحته يقف أمام المرآة لكنها لم تدرك ما الذي يفعله في البداية فقالت بخمول :
_ اقفل الشباك ياكرم مش عارفة أنام !
اتاها صوته الحاني وهو يقول مداعبًا :
_ تنامي إيه تاني !! .. الساعة عشرة يا شفق ، ده أنا بصحي بلاقيكي صاحية قبلي من الساعة سبعة ، كفاية يلا قومي بلاش كسل
_ اووووف ياكرم
اعتدلت جالسة وهي تتأفف .. وتفرك عيناها لتزيج عنهم آثار الخمول فتنتبه أخيرًا إلي ملابسه وهو يقف يسرح شعره الغزير ويهندم من مظهره ، ضيقت عيناها وقالت بحزم :
_ إيه ده !! .. إنت رايح فين ؟!
كرم ببساطة وهو مستمر في تسريح شعره غير مباليًا بنبرتها الحازمة :
_ رايح الشركة
هبت واقفة من الفراش واقتربت منه تهتف بنفاذ صبر وسخط :
_ يعني مفيش فايدة فيك !! ، ده بدل ما تقعد في البيت وترتاح عشان متتعبش اكتر عايز تروح الشغل !!!
استطرد ببرود تام وعدم اكتراث لسخطها :
_ شفق إنتي مش شايفة إنك مزوداها شوية .. ده الدكتور ذات نفسه لما كنا عنده إمبارح قال إن وضعي الحمدلله كويس أوي وكلها اسبوعين ولا اكتر وهرجع امشي على رجلي زي الأول ، فملوش لزمة القلق ده كله
أشارت إلى نفسها بسبابتها بما جحظت عيناها من رده :
_ يعني أنا مزوداها عشان خايفة عليك !
استدار لها وانحني على وجنتها يلثمها برقة متمتمًا :
_ لا مش قصدي كدا ياحبيبتي أكيد .. بس أنا خلاص جبت اخري من قعدة البيت
تنهدت الصعداء بعدم حيلة ورفعت جسدها الضئيل لقامته الطويلة والعريضة لتطبع قبلة على وجنته المزينة باللحية الخفيفة وتمتمت :
_ طيب بس متتأخرش ياحبيبي ومترهقش نفسك في الشغل
_ حاضر ياقلب حبيبك
ثم مال عليه وهمس غامزًا بعيناه في لؤم ونظرات جريئة :
_ عايز ارجع الاقي أميرتي مجهزالي سهرة صباحي حلوة كدا زيها
ابتسمت له بحب وهمست بدلال أنوثي جميل :
_ بس كدا من عيوني
خطف قبلة سريعة قبلة أن يستدير وينصرف تاركًا إياها تتنهد بحرارة ثم اتجهت للحمام حتى تأخذ حمامها الصباحي المعتاد ! …
***
داخل مقر شركة عائلة العمايري …..
وأخيرًا بعد غياب دام لثلاث أيام هاتفه يعطي الرنين .. تهللت اسارير حسن الذي كان يتصل به حيث نظر إلى أخيه وقال بوجه مشرق :
_ بيرن الحمدلله
ردد كرم خلفه براحة وابتسامة عريضة :
_ الحمدلله .. لما نشوف الاستاذ كان بيعمل إيه وقافل تلفونه ليه
ظل حسن مترقب لإجابته على الهاتف ، لكن الرنين طال ولا توجد إجابة منه .. وعلى آخر رنة سمع صوته يهتف بهدوء :
_ ايوة ياحسن
هدر حسن بعصبية بسيطة معنفًا إياه بشراسة :
_ إنت بتستهبل يا زين !! .. ليك تلات أيام قافل تلفونك ومحدش عارف يوصلك والكل قلقان عليك وأمك ومراتك هيتجنوا من الخوف عليك
أجاب عليه بصوت رخيم :
_ كنت عايز اقعد وحدي لكام يوم وقفلت تلفوني عشان محدش يزعجني ياحسن
ضحك حسن من الغيظ على إهماله ونظر لكرم ثم ناوله الهاتف وقال بصوت صلب :
_ خد كلمه إنت عشان أنا لو اتكلمت اكتر من كدا هتخانق معاه
جذب كرم الهاتف منه وأجاب على أخيه بنبرة رزينة :
_ ايوة يازين .. في إيه وإنت من إمتى بتقفل تلفونك يابني ، يعني إنت مش عارف أمك بتقلق إزاي من أقل حاجة .. ثم إن شغل إيه ده اللي معاك هناك ؟!
_ كان معايا شوية حجات خلصتهم وجاي بكرا متقلقوش .. ابقى اتصل بماما وطمنها وأنا هكلم ملاذ
لمس نبرة الشجن في صوته فثبت نظره على حسن الذي كان يحدق به بتركيز وقال بخفوت :
_ إنت قولت لإسلام ولا إيه ؟
زين بصوت مهموم :
_ اممممم قولتله وكنت محتاج اقعد مع نفسي شوية عشان استعد لما ارجع لردة فعل ملاذ كمان
هتف كرم بنبرة مشفقة عليه وبدفء :
_ أنا واثق إن ملاذ هتفهمك .. بعدين أنا قولتلك قبل كدا أن إنت كمان كنت ضحية في اللي حصل يازين
ارتفعت نبرة صوته وهو يقول في شبه صيحة مستاءًا :
_ متحاولش تقنعني إني مش غلطان ياكرم .. أنا اللي عملت في نفسي وإسلام كدا ، وأنا اللي خبيت عن مراتي لغاية ما وصلنا للمرحلة دي .. ودلوقتي لازم اتحمل نتيجة اخطائي زي ما اتحملتها زمان
لوى فمه بأسى على أخيه وتمتم بخشوع :
_ طيب هدى نفسك خلاص ولما تاجي بكرا نبقى نقعد احنا التلاتة ونتكلم
_ سلام
قالها بجفاء قبل ينهي الاتصال فورًا فانزل كرم الهاتف من على أذنه متنهدًا بضيق ليرمق حسن الذي كان حاله لا يختلف عنه كثيرًا ، والوضع لم يكن يحتاج لشرح حيث أنه فهم كل شيء من آخر جملة قالها كرم !! …
***
تقوم بتحضير وجبة الغذاء في المطبخ ، فقد اقترب موعد قدوم زوجها وهي اعتادت أن يعود من عمله يجد الغذاء جاهزًا .. بالرغم من أنها لا تشعر نفسها بخير منذ الصباح ولكنها تتحامل على نفسها وتكمل مهامها ، متجاهلة الألم الذي يمسك في بطنها وينغزها كالذي وجد سكين فيغرزها ويخرجها من معدتها بقوة .
وبينما هي مندمجة في تقطيع الطماطم اجتاحها ألم لا يحتمل ، التوى ظهرها للأمام على أثره وهي تتأوه بقوة ممسكة ببطنها وظلت ممسكة بها على أمل أن يذهب الألم ولكنه يزداد أكثر فأكثر ، فتعالت صوت تأوهاتها وسارت للخارج بصعوبة حتى وصلت إلى هاتفها فالتقطته واجرت اتصال به ، بعدما جلست على الأريكة وهي تضغط على بطنها كاعتقاد منها أن الألم سيخف هكذا ، لكن العكس ! .
اجاب على الهاتف بصوت طبيعي ليأتيه صوتها المتأوه والذي يغلبه البكاء وهي تستنجد به :
_ ايوة ياعلاء تعالى الحقني بسرعة .. تعبانة أوي
كان سيجيب عليها ليسألها مالذي بها بالضبط لكن صك سمعه صوت تأوهاتها المرتفعة فوثب من مقعده مزعورًا وقال بصوت متلهف :
_ حاضر حاضر أنا جايلك اهو ياميار
انزل الهاتف من على أذنه والتقطت مفاتيحه الخاصة وغادر مكتبه مهرولًا إلى الخارج ، بينما يسر فكانت في طريقها إليه لكنها تصلبت مكانها بعدما رأته يركض بهذا الشكل لتصيح منادية عليه بقلق :
_ عـــــــلاء
لم يجيبها وربما لم يسمعها حتى من فرط توتره على زوجته وهلعه ، قوست حاجبيها بريبة ومن داخلها تدعو ربها أن لا يكون هناك شيء سيء حدث ، ثم غيرت وجهتها واتجهت نحو مكتب زوجها …..
***
فتحت الباب دون أن تطرق ودخلت فرأته يقف أمام النافذة الكبيرة واضعًا كفيه في جيبي بنطاله ويعطي للباب ظهره ، التفتت خلفها تجاه الباب واغلقته بحذر حتى لا يصدر أي صوت مزعج .. ثم تحركت نحوهه ووقفت بجواره ممسكة بكفه هامسة باهتمام :
_ مالك ياحبيبي ؟!
سحب كفه بقسوة من بين يديها ، لتستقر في عيناه نظرة مرعبة وهو يجيبها بغلظة صوته الرجولي :
_ إنتي إيه اللي جابك ؟!!
ارتبكت قليلًا من لهجته ونظرته .. هدرت بخفوت :
_ لقيت نفسي كويسة ياحسن فقولت آجي الشركة اصل الشغل وحشني ، ومنها اساعدك شوية
تحول إلى جمرة نيران متوهجة حيث رأته وهو يعتدل في وقفته ليصبح مواجهًا لها تمامًا ويقول بلهجة أشد قسوة وخشونة من السابقة :
_ إنتي شاورتيني قبل ما تطلعي وقولتيلي إنك عايزة تاجي الشغل ؟!!
أخذت نفسًا عميقًا وتمتمت بطاعة تامة دون أن تدخل معه في أي جدال :
_ أنا آسفة كان لازم اشاورك الأول فعلًا .. بس متوقعتش إنك هتتعصب يعني !!
أصبح كبركان على وشك الأنفجار وهو يهتف بنظرة دبت الخوف في نفسها :
_ وهو أنا المفروض متعصبش لما تطلعي من غير ماتقوليلي مثلًا !!
تراجعت خطوة للخلف وأجابته بنظرات مستغربة :
_ في إيه ياحسن مالك !
تفحص ملابسها بعيناه التي كانت تطلق شرارات الغضب العاتية ، ترتدي نفس الرداء الذي يثير جنونه ويعصبه .. هتف في شبه صيحة عنيفة بها وهو يشير بعيناه على ملابسها :
_ بعدين أنا كام مرة هقول الفستان الزفت ده متلبسهوش تاني
هبطت بنظرها على ملابسها ثم رفعته مرة أخرى وثبتته عليه تطالعه بريبة من عصبيته الغريبة ، هي اخطأت بالفعل لكن يبدو أن الامر ليس لمجرد خروجها بدون أذنه فقط ، ومن حماقتها أنها لم تنتبه لكلامها وتحدثت بعفوية وشيء من الخنق :
_ إنت متعصب كدا ليه .. أنا مش كنت متفقة معاك إمبارح إن ممكن ارجع الشغل النهردا أو بكرا .. بس لما لقيت راسل موجود قولت آجي وبالمر اسلم عليه
رسم ابتسامة مخيفة على شفتيه ولمعت عيناه بوميض ليس بطبيعيًا ، كأنه كان ينتظر منها هذا الرد ! .
فور رؤيتها له على هذا الوضع ادركت فداحة الخطأ الذي ارتكبته بسذاجتها ، فكيف تخبره أنها جاءت خصيصًا لرؤية أكثر شخص يكرهه ولا يطيقه ؟! .
رأى في عيناها نظرات مضطربة من مواجهة طوفانه ، تقهقرت للخلف ولا تزيل نظرها عنه حتى اصطدمت بالمكتب فوقفت واستندت بكلتا كفيها على سطحه وانحنت بنصف جسدها للخلف بعدما وجدته يهل عليها بهيئته الضخمة وينحنى للأمام عليها هامسًا وهو صر على أسنانه بقوة وبهدوء ما قبل العاصفة :
_ آه يعني إنتي جاية عشان تشوفي راسل !!
هزت رأسها يمينًا ويسارًا عدة مرات متتالية تنفي إجابته بتوتر ملحوظ ، فيستكمل هو استجوابه المخيف لها :
_ كنت بتعملي إيه معاه تحت ؟!
يسر بابتسامة لطيفة تحاول تهدئة الأجواء المتوترة :
_ ولا حاجة ياحبيبي .. أنا شوفته وأنا داخلة الشركة وهو كان طالع ووقفت سلمت عليه وسألته عن خالتو .. وبس
تمتم مستنكرًا إجابتها :
_ وبس !!
رفعت كتفيها لأعلى تهمس برقة :
_ أه وبس
عادت نبرة صوته لترتفع من جديد وتاخذ عيناه اللون الأحمر مرة أخرى وهو يهتف محاولًا كتم غيظه :
_ ليكي ربع ساعة واقفة معاه وبتسأليه عن خالتك !! .. ليه كان بيحكيلك يوميات أمه ولا إيه !
ضحكت بتكلف لتلطيف الجو وضربته على أعلى صدره بخفة هاتفة بمزاح :
_ دمك خفيف يابيبي والله
انتفضت واقفة على أثر صرخته بها منفعلًا من تعاملها مع الموقف ببساطة :
_ أنا مش بهزر يايـــســـر !
لوت فمها بتذمر وتفادت النظر إليه لتقول بامتعاض :
_ حاضر ياحسن هقطع علاقتي بابن خالتي خالص عشان ترتاح .. حلو كدا !!
ثم همت بالاندفاع إلى خارج المكتب لولا يديه التي قبضت على ذراعيها وقال بلهجة صارمة :
_ خدي هنا رايحة فين ؟
_ رايحة مكتبي !!
_ مش هتروحي مكان .. اقعدي هنا على الكنبة وأنا هخلص شغلي وهاخدك ونروح البيت
همت بأن تعترض على أوامره فباغتها هو برده الأسرع منها وهو يحدجها بنظرات محذرة وقوية :
_ سمعتي قولت إيه ولا لا ؟!


