رواية كاملة بقلم ندى محمود
ندى محمود
***
فتحت الباب بعد أن سمح لها بالدخول ، وسارت نحوه وهي تحمل بيدها كوب القهوة الخاصة به ثم وضعته أمامه على مكتبه المتوسط وجلست على الفراش موجهة حديثها إليه برزانة :
_ مش ناوي بقى ياكرم تبعد عن موضوع اللي قتل أروى ده وتسيب البوليس يشوف شغله معاه
ليس من عادته أن يرفع نبرة صوته على والدته ، بل لم يفعلها منذ صغره وهو يحاول منع انفعالاته أمامها الآن حيث قال بنبرة واضح عليها الاستياء :
_أنا مش فاضي يا أمي !
استقامت واقتربت من مقعده جالسة في وضع الاستعداد وهي تستند بيدها على حافة المقعد وتطالعه بدموع امتزجت بنبرتها المتوسلة :
_ ابوس إيدك يابني ، أنا مقدرش أشوف فيك ضرر إنت وأخواتك ولو حصلك حاجة لقدر الله من ورا المجرم ده هموت فيها
فر استيائه وحل محله الحنان والرقة التي تذيب قلب أي امرأة حتى أمه ، وأمسك بيدها هامسًا بنعومة :
_ بعد الشر عليكي ياست الكل ، وبعدين هيحصلي إيه يعني ، أساسًا ميقدرش يعمل حاجة معايا ده واحد قاتل وهربان من الحكومة
هبت واقفة وصاحت به بانفعال أمومي خائف :
_ اديك قولت قاتل .. معنى كدا أنه مش هيتردد لحظة في إنه يقتلك كمان ، ولو معملكش حاجة إنت مش هتسيبه سليم وهتخش فيه السجن وفي كلتا الحالتين هخسرك ، ليه هتضيع نفسك يابني عشان واحد قذر زي ده .. فكرك إن اروى مبسوطة كدا وهي شيفاك بتقضي على حياتك وحتى الجواز رافضه بتاتًا
عادت نظراته للحدة مجددًا وهو يجيبها بشراسة :
_ أيوة هي فعلًا مش مبسوطة .. مش مبسوطة لإني مخدتلهاش حقها ، ده مش واحد قتلها بعربية ولا مسدس ولا سكين ، ده مسألة شرف وأنا يستحيل أسيب حق مراتي يضيع كدا ، هاخد حقها حتى لو على موتي .. وانتقامي منه هيكون مختلف زي طريقة قتله ليها ، وأنا معنديش حاجة أخاف عليها لا زوجة ولا عيال وإنتي ورفيف الحمدلله زين وحسن موجودين يعني غيابي مش هيأثر عليكم
صدمها رده الذي لا يحمل أي مسئولية ، وكأنه مراهق متهور لا يعرف الخطأ من الصح ويسير إينما تلقى به الرياح حتى وإن كان طريق كله الغام .. فكان الرد منها صادم أيضًا بالنسبة له حيث قالت بصرامة وجدية تامة :
_ إنت عايز تنقطني ياواد ، إيه الجنان اللي بتقوله ده إنت أكيد مش واعي للي بتقوله ! .. أنا مش بقولك متخدش حقها لا طبعًا خد حقها وانتقملها بس بالقانون مش بالبلطجة ، واسمع بقى ياكرم والله العظيم لو أذيت الواد ده وعملت فيه زي مابتقول اتأكد إنك خسرتني للأبد وهغضب عليك لآخر نفس فيا .. وابقى لما تلاقيه اختار ياتاخد حق مراتك بالقتل وتحرق قلبي عليك يإما تاخد رضايا عليك اللي هينفعك في دنيتك وآخرتك ، وأنا قولتلك أهو وحذرتك
هب واقفًا ثائرًا وهو يهتف بضجر شديد :
_ إنتي ليه مش عايزة تفهمي اللي جوايا ، أنا جوايا نار بتاكل فيا وبتزيد كل ما افتكر واتخيل اللي حصلها ، دي مراتي يا أمي وكانت أسبوع بس و هتبقى في بيتي ومعايا ، محدش فاهم وجعي ولا المي ، من جهة إني خسرتها قبل ما احصل عليها أصلًا ومن جهة الطريقة اللي ماتت بيها ومن جهة شوقي ليها ، وصورتها اللي مبتفارقش أحلامي من ساعة ما ماتت .. واللي واجعني اكتر إنها كانت حبيبتي مش مراتي بس وكنت مستني اللحظة اللي نجتمع فيها مع بعض في بيت واحد واتحرمت من ده كله ، بسبب ال******** اللي بتقوليلي لو أذيته هغضب عليك ، عايزاني انسى اللي حصل واقول يلا مش مشكلة ماهي ماتت والحي ابقى من الميت وهو مسيره ياخد جزائه .. أنا آسف يا أمي سامحيني ارجوكي بس مش هقدر أعمل اللي بتطلبيه مني ، لإني لو مخدتش حقها ناري اللي جوايا هتقتلني وتحرقني أنا
ثم انصرف من أمامها ومن الغرفة بأكلمها ، وتركها في نازلتها التي سيترتب عليها خسارتها لأحد ابنائها وزهرة قلبها ، فما كان عساها شيء سوى البكاء بحرقة وهي تندب حظها وتنوح بصوت خفيض كأنها في عزاء أحدهم .. فقد خسرت زوجها جراء لحادث أليم وكانت ستفقد معه ابنها الذي هو كان رافض الزواج ايضًا بسبب ماضيه الذي لا يرحل عن باله واقنعته بصعوبة أخيرًا بالزواج ، وحسن الذي لا يحمل مسئولية شيء مطلقًا ويعيش لنفسه فقط ، وكرم الذي سيقضى على نفسه بسبب غضبه وتهوره وحزنه على زوجته .. ماذا عساها أن تفعل مع ثلاث رجال كهؤلاء سوى الدعاء لهم بالهداية ! . احست بانفاسها تضيق وإنها لا تقوى على الوقوف فسقطت فاقدة للوعى جراء مرضها بالقلب ! .
***
داخل أحدي المستشفيات …
كان يسير إيابًا وذهابًا في الطرقة أمام الغرفة الكامنة فيها أمه ، ويلعن نفسه في اللحظة ألف مرة لأنه السبب في كل هذا ، وشقيقته تجلس على أحد المقاعد ولا تتوقف عن البكاء ، اقترب منها وانضم لها على مقعد مجاور لها وضمها لصدره هامسًا :
_ خلاص يارفيف ، كفاية عياط إن شاء الله هتبقى بخير .. ادعيلها ربنا يقومها بالسلامة
لم تجيبه واكتفت ببكائها بين ذراعيه ، أما هو فانتبه لحسن الذي يتجه نحوهم راكضًا وثواني حتى وقف أمامهم وقال بصوت لاهث ووجه مذعور :
_ حصل إيه ياكرم ماما مالها ؟
_ لسا الدكتور مطلعش من عندها ، قولت لزين ؟
هز رأسه نافيًا وأجاب برزانة :
_ لا لما يطمنا الدكتور عليها هتصل بيه بلاش نقلقه من دلوقتي ، فهموني حصل إزاي ده ؟
تحدثت رفيف بصوت مبحوح ونبرة واضح عليها البكاء العنيف :
_ كانت بتتكلم مع كرم وأنا سمعت صوتها بتزعق معاه وبعدين هو طلع وسابها وأنا طلعت أشوفها لقيتها واقعة على الأرض
تأفف حسن بعنف بعدما توقع سبب شجارهم ونظر إلى أخيه شزرًا هاتفًا بغضب هادر :
_ إنت مش عارف إن أمك عندها القلب يعني ! ، ولا هو عشان تاخد حق مراتك هتخسر أمك بسبب عنادك ياكرم
أشار إلى رقبته وأجابه بوجه محتقن بالدماء :
_ حسن أنا واصلة معايا لهنا ، متتكلمش معايا نهائي
أماء بحدة وغيظ وتمتم وهو غير واعي لما يخرج منه فمه :
_ آه ما أنت أهم حاجة عندك مراتك ، مش مهم أمك يحصلها حاجة ولا تموت ، ابقى خلي انتقامك لمراتك ينفعك لما أمك تحصلها بسببك
وثب واقف ورفع سبابته في وجهه محذرًا إياه بنظرة مميتة :
_ آخر مرة هقولهالك ، اتجنبني خالص ياحسن ، وموضوع مراتي محدش ليه دعوة بيه ، متشغلوش بالكم بيا بس ومحدش هيحصله حاجة
ثم انصرق وترك أخيه يتابعه وهو يغادر مندهشًا ، ثم عاد بنظره إلي شقيقته وقال :
_ شايفة بيقول إيه !! ، لا ده اتجن على الآخر
_ سيبه ياحسن متتغطش عليه ، هو كمان معذور حط نفسك مكانه وهتفهمه ، وعلى فكرة هو قلقان على ماما أكتر مننا
صاح حسن في انفعال :
_ ياعم أنا مقولتش إني مش فاهمه ولا إن هو مش قلقان على ماما ، بس يعمل حساب إن أمه مريضة ومش بتستحمل ويمسك أعصابه قدامها ، كلنا بنحاول نبعد عنها الضيق عشان متتعبش وهو مجرد ما حد يفتح معاه موضوع اروى بيتحول
قطع حدوثهم خروج الطبيب من الغرفة فركضت رفيف أولًا له تنتظر منه أن يخبرهم بوضع والدتهم ، وكان حديثه أعاد لهم الحياة من جديد حيث قال :
_ اطمنوا الحمدلله هي كويسة بس ياريت تتجنبوا إنها تتعرض لمواقف تزعلها أو تعصبها ، هي دلوقتي فاقت وزي الفل تقدروا تدخلوا ليها
_ تمام شكرًا يادكتور
قالها حسن ممتنًا بإبتسامة واسعة ، أما رفيف فلم تنتظر شيء حيث هرولت إلى داخل الغرفة وعانقت والدتها بقوة وهي تهتف بسعادة ممزوجة بالدموع :
_ حمدلله على سلامتك ياماما ، ليه كدا تضايقي نفسك إنتي مش عارفة وضعك يعني ياماما
غمغمت بصوت متعب ومنخفض :
_ الحمدلله ياحبيبتي
رأت حسن الذي انضم لهم للتو واقترب من فراش والدته ثم انحني وطبع قبلة رقيقة على جبهتها مغمغمًا بابتسامة مداعبة :
_ طاب ما إنتي زي الحصان أهو يادود ، أمال عايزة تقلقينا بس وخلاص عليكي
نظرت هدى إلى ابنتها وقالت بتصنع الضيق مازحة :
_ إيه اللي جاب الواد ده هنا
ضحكت رفيف بقوة وانطلقت هو منه ضحكة رجولية متأججة وأجابها معاتبًا :
_ اخص عليكي ده جزاتي يعني ياست الكل
نقلت نظرها بين أركان الغرفة ثم قالت باستغراب وقلق :
_ كرم فين ؟
تمتمت رفيف وهي تنظر لحسن بلوم :
_ اتخانق مع حسن قبل ما يطلع الدكتور من عندك وشكله طلع يقعد برا ، هروح انده وأقوله إنك فوقتي
ثم استقامت وغادرت ، بينما حسن فكان يخطف نظرات إلى والدته التي تطالعه باستياء وعتاب شديد ، وقبل أن ترمي عليه عتابها وغضبها قال :
_ متبصليش كدا ، هو غلطان !
_ لا مش غلطان .. إنت عارف أخوك عمره ما على صوته عليا ، أنا اللي حصلي ده بسبب خوفي عليه ليعمل حاجة في نفسه بسبب عنده .. وإياك ياحسن تكلم أخوك وتشد معاه تاني ، ده بيني وبينه ملكمش دعوة إنت وزين
جلس على حافة الفراش وقال ساخرًا بابتسامة :
_ حاضر مش هنقرب من ابنك حبيب قلبك ، بس أنا بقى مش هتدخله في أي حاجة
أظهرت عن وجهه الغاضب وقالت :
_ أهو إنت اللي هتتعبني .. هتتدخل ياحسن إنت وعدتني وإلا ….
قال ضاحكًا بمشاكسة :
_ من غير وإلا ياعم ، بهزر معاكي أكيد مش هسيبه يودي نفسه في داهية المتخلف ده
عادت الراحة لقسمات وجهها وقالت باسمة بحب أمومي :
_ ربنا يكرمك ياحبيبي ، أيوة كدا خليك ورا أخوك ومتسبهوش
