دودود محمد الجزء الثاني

-فى حيات كل واحده فيكم هيظهر ليها الحب الحقيقى مره واحده بس ويا تحفظوا عليها وتعيشوا اسعد ايام حياتكم يا ضيعوا الفرصه من ايديكم وتفضلوا تندموا عليها طول عمركم وتعيشوا أتعس ايام حياتكم الحياة فرص حاولوا مضيعوش الفرصه دى من ايديكم.
ابتسموا له بأمتنان وقاموا بالعمل الخاص بهم وخرجوا وتركوهم مره اخرى بمفردهم.

تنهدت بوجع وقالت بصوت مختنق
-عارف يا وليد اوقات كتير كنت بتمنى و أقول ياريتك كنت الحب الاول ياريت كنت قابلتك قبل ما اقابل ريان كانت حاجات كتير اوى اتغيرت كنت قدرت احبك قد حبك ده واكتر بس للاسف النصيب محدش ليه يد فيه كل شئ مقدر ومكتوب وكل مقدر ليه رساله ألهية منعرفش معناها غير متأخر اوى.

قبل يدها بحب وقال بنبره هادئه
-وانا راضى بالمقدر وبالمكتوب ومش عايز حاجه منك غير انك تفضلى جنبى لاخر نفس فيا

تكلمت بلهفه وقالت
-بعد الشر ربنا يطول فى عمرك ويخليك لينا.

ابتسم لها بحب وقال
-ويخليكى ليا يا أغلى حاجه فى حياتى، روحى اطمنى على الأولاد يا بتول وأياكم حد يقسي على فرح البنت صغيره ومحتاجه حد يوجهها بهدوء وحكمه صحبيها يا بتول علشان تيجى تحكيلك كل حاجه وتقدرى توجيهها لصح واضح اوى أن زياد بيحبها واللى عمله ده نتيجة الغيره.

اومأت رأسها بالطاعه وقالت
-حاضر يا وليد هطلع اطمن عليهم وهجيلك تانى بسرعه

ومالت على رأسه وضعت عليها قبله حنونه وخرجت وتركته

نظر إلى أثرها بحب وابتسم بسعاده ثم اغلق عينه بألم ووضع يده على قلبه حتى يهدأ قليلا.
………………………………………………….
وصلت حور الشركه وبحثت بعينيها على زين لكنها لم تجده أمسكت الهاتف الخاص بها وأجرت اتصالا به وانتظرت الرد ثوانى معدودة وسمعت صوته المختنق يقول لها

-صباح الخير يا حبيبتى

ردت عليه بلهفه وقالت
-صباح النور يا حبيبى، اتأخرت ليه النهارده عمو وليد تعب تانى ولا حاجه

أجابها بصوت متضايق وقال بتوضيح
-هيتعب اكتر من كده ايه يا حور ما انتى سمعتى الدكتور قال ايه، انا مش هقدر اجى الشركه تانى أنا همسك شركة بابا وعمى مروان لأن بابا تعب ومش هيقدر يدير الشركه لوحده حتى بعد ما يعمل العمليه وهو كان طلب منى كتير اوى اساعده وانا كنت برفض بغبائى وبكره كمان نغم تستسلم نصيبها بتاع ابوها فى الشركه ونديرها أحنا الاتنين سوا

زفرت بضيق وتكلمت بصوت مختنق
-ماشى يا زين أنا هقفل بقى سلام

تكلم زين سريعا وقال
-حور استنى انتى زعلتى ليه؟

أجابته بضيق وقالت
-علشان أنا كده هتحرم منك وبعد ما كنت بشوفك طول النهار فى الشركه وبقعد أعد ساعات الليل علشان النهار يطلع وأجى اشوفك مش هعرف اشوفك

رد عليها بنبره هادئه وقال
-يا حبيبتى دى ظروف وجددت علينا غصب عننا وكمان بابا يبقى كويس بس هاجى اطلبك ونسرع فى الجواز شويه علشان نبقى مع بعض تحت سقف واحد وبدل ما تعدى الساعات علشان يطلع النهار وتيجى تشوفينى هتبقى فى حضنى

تنحنحت بأحراج وقالت
-احم م م ماشى هقفل أنا بقى علشان اروح اشوف شغلى قبل ما بابا يعلقنى

تكلم زين بتحذير وقال
-حسك عينك تكلمى رجاله واياكى تطلعى بره مكتبك ولو فيه حاجه مهمه فى الشغل والتعامل هيكون مع راجل خلى انس يتعامل هو مفهوم

ابتسمت بسعاده وقالت
-حاضر، وانت كمان اياك تبص لواحده كده ولا كده هخزقلك عينك فاهم

تعالت ضحكاته الرجوليه وقال
-وهى الدنيا دى كلها فيها واحده تملى عينى غيرك؟ بلاش جنان انتى اللى مستحوذه على العين والقلب، سلام.

أغلقت الخط مع زين واحتضنت الهاتف بسعادة وقالت
-بحبك بموت فيك بعشقك

انتفضت مكانها عندما سمعت صوت انس بجوار اذنيها
-ما تتهدى انتى وهو بقى يا شيخه يخربيت رومانسيتكم اللى تموع النفس دى

نظرت له بضيق وقالت
-خضتنى يا غلس

وقف أمامها وقال بتهكم
-ياريت يا اختى تتخضى وتقطعى النفس خالص علشان ارتاح من سهوكتك دى امشى أنجرى قدامي يا ام رومانسيه تموع النفس

ابتسمت على كلماته وقالت
-اه من حقك ما اللى كان بياخد حقى منك ساب الشركه وهتستفرد بيا يا قاسي

تكلم بدعابه وقال
-قاسي قاسى قاسي وتعب احساسي راح هسيبه يأسي وهبكى عنيه

رفعت احدى حاجبيها إلى الاعلى وقالت بتهكم
-انت عندك خال اهبل يا أنس

حرك رأسه بالرفض وقال
-لا عندى عمى أيوب هيولع فينا لو مروحناش نشوف شغلنا دلوقتى حالا

وفى هذا الوقت سمعت صوت ايوب الغاضب من خلفها
-حور واقفه عندك كل ده بتعملى ايه

استدارت إلى والدها ونظرت له بتوتر وتكلمت وهى تكبت ضحكاتها
-أنا!! ده أنا جايه من بدرى أوى وكنت بدور على أنس علشان نشتغل وهو اللى لسه جاى

اتسعت عين انس فى صدمه وقال
-انااا

اومأت رأسها بالتأكيد وقالت وهى تكتم ضحكاتها
-أيوه انت صدقنى يا أيوب زى ما بقولك كده لسه جاى وحاجه اخر استهتار الصراحه

ضغط ايوب على أسنانه بغضب ونظر لهم الاثنين وقال
-اتفضلوا على مكاتبكم مش جاين نلعب احنا هنا
وتركهم وأتجه إلى مكتبه

نظر انس بغيظ إلى حور وقال
-بقى أنا اللى لسه جاى يا كدابه

تعالت ضحكاتها وتكلمت بصعوبه
-معلش بقى يا انوس اصل بابا لو عرف أن انا اللى متأخره كان علقنى إنما أنت مش هيعملك حاجه

مسكها من تلابيبها وقال بنفاذ صبر
-امشى يا آخرت صبرى انا حاسس ان امى دعت عليا وقالتلى ربنا يبتليك بمصيبه

وتحركوا الاثنين إلى مكاتبهم.
………………………………………………….
وصل عدى ونغم إلى المشفى ونظر إليها بقلق وقال بترجى.
-نغم احنا داخلين المستشفى دلوقتى خالتو قمر جات جوه لو شافتك بالشكل ده هتشك فى حاجه حاولى تظهرى بطبيعتك قدامها.

اومأت رأسها بالطاعه وقالت بصوت حزين
-حاضر
وهبطت من السياره وتركته

اخذ عدى نفس عميق وأخرجه بهدوء وقال
-ربنا يستر وخالتو قمر متحسش بحاجه

وهبط من السياره وتحرك معها إلى الداخل

عندما رأتهم بتول سويا ابتسمت بسعاده ومالت على قمر وقالت
-بسم الله ماشاءالله شكلهم حلو اوى يا قمر ولايقين على بعض

ابتسمت بسعاده ونظرت لهم وقالت بتمنى
-ربنا يسعدهم عشنا عمرنا كله بنحلم باليوم ده عقبال ما يتجمعوا فى بيت واحد يارب

اقتربت نغم إلى قمر ودون مقدمات ارتمت داخل أحضانها وتمسكت بها وظلت تبكى

حدق بها عدى بنفاذ صبر ووضع يده على وجه وقال
-ده اللى اتفقنا عليه يا نغم اهو مش هنخلص من اسألتهم

ربتت قمر على ظهر نغم بحنو وتكلمت بقلق
-مالك يا حبيبتى بتعيطى ليه

تدخل عدى سريعا وقال
-ها م م مافيش يا قمرى شدينا أنا وهى مع بعض شويه وشكلها كده دلوعه وكبرت الموضوع

نظرت قمر له بضيق وتكلمت بتحذير
-احنا هنبدأ ولا أيه ؟ لا خلى بالك مش هسمحلك تنزل دموع بنتى مهما حصل فاهم

ابتسم لها بتوتر وقال
-فاهم طبعا يا قمرى، وبعدين بلاش شغل الحموات ده من البدايه كده

ابتسمت على كلماته وابتعدت نغم عن حضن قمر وقالت
-مافيش حاجه يا ماما متقلقيش أنا كويسه بس اول مره عدى يتكلم معايا كده وعلشان كده اتفاجئت وغصب عنى دموعى نزلت

تكلمت بتول بأبتسامه وقالت
-معلش يا قلب خالتك استحملى الولا ده شويه الشغلانه بتاعته صعبه واوقات بيبقى ماسك قضيه معقدة وبيبقى طول الوقت عصبى متوتر

نظرت إلى عدى بحب وقالت بنبره هادئه
-عارفه يا خالتو وانا مهما حصل عمرى ما ازعل منه

أحاط نغم بذراعه وقال بحب
-يخليلى العاقل يارب، بعشقك يا بت قمرى

احمرت وجينتها بخجل وابتعدت عنه وقالت بتلعثم
-ع ع عدى اتلم بقى

تعالت ضحكات قمر وبتول عليهم بسعاده

تكلم عدى بتساؤل وقال
-بابا عامل ايه دلوقتى يا ماما

أجابته بقلق والدموع تتلالق فى عينيها
-تعبان يا عدى وبيداري عليا علشان مقلقش انا خايفه عليه اوى
رد عليها بهدوء وقال بأبتسامه
-بابا قوي طول عمره بيستحمل

وفى ذلك الوقت شعروا بحركه غير طبيعيه بالمشفى وجميع الدكاتره يركضون إلى الغرفه المتواجد بها وليد تحرك عدى إلى أحدى الممرضات وقال بتساءل
-هو فيه ايه

ردت عليه الممرضه وهى تتحرك بأتجاه الغرفه

-المريض تعب وقلبه وقف خالص

وفى ذلك الوقت سمعوا صوت ارتطام على الأرض وصراخ قمر
-بتووووول
………………………………………………….
استيقظ ريان من نومه وانتفض من مكانه عندما وجد الوقت تأخر عن ميعاد العمل هتف على منى بغضب وقال
-انتى يا هانم ازاى سيبانى انام لحد دلوقتى

نظرت له بعدم اهتمام وقالت
-اعملك ايه يعنى مش ذنبى ان حضرتك نمت متأخر علشان كنت قلقان على حبيبة القلب

اغلق عينه بغضب شديد وقال بصراخ
-مننننننى متعصبنيش

هدرت به بغضب وقالت بصراخ
-كفااااايه حرام عليك تعبت وزهقت مبقتش قادره أستحمل اللى بتعمله ده، حبك ليها وخوفك عليها الواضح فى عيونك ده انت مبتحسش بنفسك وهى قصادك، انت عارف يعنى أيه ابقى شايفه جوزى بيحضن واحده تانيه بعنيه قصاد عينى عارف شعورى ايه وانا بسمع نطق جوزى لاسم حبيبته قصادى، للاسف يا ريان انت انانى اوى عايز تاخد كل حاجه ليك ومتديش، عايز عيله كبيره وبيت هادى وفى نفس الوقت عايز تعيش حياتك وقلبك يختار اللى حبيتها زمان، انا مش هقدر اكمل معاك تانى على الوضع ده يا ريان، طلقنى

نظر لها نظره مطوله وقال بنفاذ صبر
-أنا اللى تعبت وزهقت من حوار كل يوم ده قولتلك مليون مره أنا مضحكتش عليكى من أول لحظة عرض عليكى الجواز قولتلك قلبى فيه واحد بس ومستحيل حد غيرها يسكنه ويشهد عليا ربنا من اللحظه اللى دخلتى فيها حياتى وانا بعاملك بكل ود واحترام مقصرتش معاكى فى اى حاجه خلقت ليكى انتى والبنات جو هادى ومحترم عمرى ما قللت منك قصاد بناتك حافظت على كرامتك وتوجتك فى بيتك، واللى عملته معاكى ده قليل اوى لما تلاقى راجل بيعمله فى بيته، وده اللى ربنا هيسألنى عليه فى الاخره، اعتقد بقى اللى فى قلبى ميخصش حد غيرى، مدام مقصرش على حد فيكم

تكلمت بدموع وقالت
-لا قصر عليا يا ريان انت عارف يعنى ايه واحده جوزها عايش معاها وبيحب واحده غيرها، يعنى مليون سؤال بتسأله لنفسها، أنا فيا ايه وحش يخلى جوزى يحبها هى وميحبنيش أنا، بتخلق عندها عدم الثقه في نفسها، بتعيش مهدده دايما بفكرت أن ممكن يسيبها ويروح للى قلبه حبها، بتعيش فى توتر وارق وتعب أعصاب، اه انت مقصرتش معانا فى حقوقك كزوج وكأب بس قصرت معايا كحبيب.

زفر بضيق وتكلم بصوت مختنق
-منى قلوبنا مش بأيدينا انا لو عليا كنت حبيتك من اول لحظه شوفتك فيها انتى وقفتى جنبى كتير وقت موت ماما وده اللى شدنى ليكى حسيت انك انتى الست اللى هقدر اتأقلم على وجودها معايا حسيت انك هتستحملى تقلبات مزاجى وهتقدرى تسندينى وقت ما اقع وده اللى خلانى اختارك من وسط الناس دى كلها

حركت رأسها بالرفض وتكلمت بغضب
-لا يا ريان المرادتى مش هتضحك عليا بالكلمتين بتوع كل مره انا تعبت ومبقاش عندى طاقه اكمل، طلقنى ارجوك

نظر لها نظره مطوله وقال بصوت مختنق
-انتى طالق يا منى

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى